हामी सबैकाे संसारन्यूज

काठमाडौँ । नेपालमा आएको बाढी तथा पहिरोबाट प्रभावित नागरिकका लागि अफ्रिकाबाट पनि राहत सहयोग जुट्न थालेको छ। गैरआवासीय नेपाली संघ (एनआरएनए) युगान्डाले रसुवा, नुवाकोट र चितवनका बाढीपीडितका लागि ३५ लाख रुपैयाँभन्दा बढी मूल्यका राहत सामग्री उपलब्ध गराउने भएको छ।

एनआरएनए युगान्डाका अनुसार बाढी प्रभावित परिवारका लागि टेन्ट, ग्यास चुल्हो, ग्यास सिलिन्डरलगायतका अत्यावश्यक सामग्री संकलन भइरहेको छ। युगान्डामा रहेका नेपाली समुदाय तथा विभिन्न उद्योग, व्यापार र प्रतिष्ठानबाट सहयोग जुटाएर राहत सामग्री तयार पार्ने काम भइरहेको जनाइएको छ।

एनआरएनए युगान्डाकी अध्यक्ष डा. रमा अर्यालको नेतृत्वमा राहत टोली छिट्टै नेपालका प्रभावित क्षेत्रमा पुगेर सामग्री हस्तान्तरण गर्ने कार्यक्रम रहेको संघका पूर्वअध्यक्ष रमेश कँडेलले जानकारी दिएका छन्।

उनका अनुसार विपद्को समयमा स्वदेशमा रहेका नेपालीको पीडामा साथ दिन युगान्डास्थित नेपाली समुदाय एकजुट भएर सहयोग अभियानमा जुटेको हो।

एनआरएनएका पूर्व केन्द्रीय कोषाध्यक्ष हिक्मत थापाले नेपालमा परेको विपद्का बेला सहयोगका लागि अघि बढेको एनआरएनए युगान्डाको अभियानप्रति अध्यक्ष डा. रमा अर्याल, युगान्डास्थित नेपाली समुदाय तथा सहयोगी सबै दातालाई सम्मान व्यक्त गरेका छन् ।