हामी सबैकाे संसारन्यूज

विक्रम गिरी, हाङ्जाउ (चीन) । चीनमा जारी १९औँ एसियाली खेलकुद (एसियन गेम्स) अन्तर्गत टेबल टेनिस टिम इभेन्टमा नेपाल समूह चरणबाटै बाहिरिएको छ । नेपालका पुरुष र महिला टेबल टेनिस टोली टिम इभेन्टमा समूह चरणबाटै बाहिरिएका हुन् ।

शनिबार गोङ्गशु क्यानल जिमेन्जियममा भएको समूह चरणको खेलमा समूह एफमा रहेको महिला टोली भारतसित ३-० ले हारेको हो । सिक्क सुवाल भारतीय खेलाडी दिया पराग चितालेसित ११-१, ११-६ तथा ११-८ अंकले हारेकी हुन् ।

यस्तै नविता श्रेष्ठ भारतकी यहिका मुखर्जीसित ११-३, ११-७ तथा ११-२ अंकले हारिन्। यस्तै इभान थापा मगर भारतीय खेलाडी सुतिर्था मुखर्जीसित ११-१, ११-५ तथा ११-२ अंकले हारिन् ।

यसैगरी नेपालको पुरुष टोली पनि उत्तर कोरियासित नेपाल ३-० ले हारेको छ।

पुरुषतर्फ समूह बीमा रहेको नेपालका संयोग कपाली ११-७, ११-४ तथा ११-५ अंकले हारे । अर्को खेलमा नेपालका रुविन महर्जन ११-२, ११-६ तथा ११-२ अंकले हारे भने विलोश श्रेष्ठ ११-८, ११-२ तथा ११-३ अंकले हारे ।

यसअघि नेपालको पुरुष भलिबल टोली पनि प्रतियोगिताबाट बाहिरिसकेको छ ।

एसियन गेम्समा यसपटक नेपालबाट अहिलेसम्मकै बढी २९ खेलका लागि २ सय ५३ खेलाडी सहभागी हुँदै छन् । प्रतियोगितामा सहभागिताका लागि आज नेपाली राष्ट्रिय क्रिकेट टोली पनि चीन प्रस्थान गर्दै छ ।

रासस/सांकेतिक फोटो