काठमाडौं । नेकपा एमाले बागमती प्रदेशको अध्यक्षमा कैलाश ढुंगेल विजयी भएका छन् ।
असोज ८ गतेदेखि सुरु भएको एमाले बागमती प्रदेशको प्रथम अधिवेशनको शुक्रबार सम्पन्न निर्वाचनमा ढुंगेलले आफ्ना प्रतिश्पर्धी कृष्ण प्रसाद दाहाललाई २५७ मतले पराजित गर्दै प्रदेश अध्यक्षमा विजयी भएका हुन् ।
ढुंगलले ६९६ मत ल्याएर विजयी हुँदा दाहालले ४३९ मत प्राप्त गरेका थिए ।
त्यसैगरी एक उपाध्यक्षका लागि भएको मतदानमा दावा दोर्जे लामा विजयी भएका छन् । एक उपाध्यक्ष पदका लागि ईश्वर चन्द्र पोखरेल, नारायण प्रसाद खतिवडा, राजेन्द्र प्रसाद खतिवडा र राजेन्द्र राजथला चुनावी मैदानमा उत्रिएका थिए ।
त्यसैगरी सचिवमा नवराज सिलवाल एक मतमात्र बढी ल्याएर विजयी भएका छन् । सिलवालले ५६८ मतले विजयी हुँदा उनका प्रतिश्पर्धी हस्त पण्डितले ५६७ मत ल्याएका थिए ।
त्यसैगरी खुला उपसचिवमा प्रेम कुमार महर्जन र महिला उपसचिवमा भक्त कुमारी लामा विजयी भएका छन् ।
अध्यक्ष लगायतका सबै पदका लागि सहमतिमा नेतृत्व चयन गर्ने प्रयास गरेपनि त्यो सफल नभएपछि शुक्रबार निर्वाचन भएको थियो । पार्टी कार्यालय च्यासलमा निर्वाचनमा ११३५ मत खसेको थियो ।
वि.सं.२०८० असोज १३ शनिवार ०७:०३ मा प्रकाशित
