Sansar News
काठमाडौं । प्रतिनिधि सभाको बैठक आज दिउँसो १ बजे बस्दैछ । बैठकमा शिक्षा विज्ञान तथा प्रविधिमन्त्री अशोककुमार राईले आज संसदमा विद्यालय शिक्षा विधेयकका उठेका पश्नहरुको जवाफ दिने कार्यसूची छ ।
गत शुक्रबारको बैठकमा विधेयकमाथि भएको सैद्धान्तिक छलफलमा ८५ जना सांसदले भाग लिएका थिए । त्यसक्रममा सांसदहरुले प्रस्तावित विधेयकले संविधानको मर्म र भावना बोके नबोकोको विषयमा धारणा राखेका थिए ।
संविधानमा आधारभूत तहसम्मको शिक्षा अनिवार्य र निःशुल्क भनिएको छ । माध्यमिक तहसम्मको शिक्षा निःशुल्क हुने भनेको छ । यो कार्यान्वयन नहुने गरी विधेयक आएको सांसदहरुको टिप्पणी छ ।
आधारभूत र माध्यमिक तहसम्मको शिक्षा स्थानीय तहको एकल अधिकार क्षेत्रभित्रको विषय भएको तर सरकारले केन्द्रिकृत सोचबाटै विधेयक ल्याएको भनेर सांसदहरुले सरकारको जवाफ मागेका छन् ।
सांसदहरुले शिक्षकहरुसँग भएको सहमति कार्यान्वयनको सुनिश्चितता खोजेका छन् । शैक्षिक बेरोजगारलाई ख्याल गर्नुपर्ने विषयमा सांसदहरुको जोड छ ।
यी लगायतका विषयमा शिक्षामन्त्री राइले संसदमा जवाफ दिने कार्यसूची छ ।
साथै, संसदमानै प्रतिनिधि सभाको बैठकमा विद्युत विधेयक पेश गर्ने कार्यसूची पनि छ । बैठकमा उर्जा, जलस्रोत तथा सिंचाई मन्त्री शक्ति बहादुर बस्नेतले “विद्युत विधेयक, २०८० माथि विचार गरियोस्” भनी प्रस्ताव प्रस्तुत गर्ने कार्यसूची रहेको छ ।
वि.सं.२०८० असोज २१ आइतवार १२:२७ मा प्रकाशित
