Sansar News
काठमाडौं । जनता समाजवादी पार्टीका अध्यक्ष उपेन्द्र यादवले देशबाट संघीयता नै खारेज हुने हो कि भन्ने डर भइसकेको बताएका छन् ।
बिहीबार प्रतिनिधि सभाको बैठकमा बोल्दै अध्यक्ष यादवले राजनीतिक दलहरुको व्यवहारका कारण संघीय गणतन्त्र कसरी टिक्ने र संस्थागत कसरी हुन्छ भन्ने गम्भीर प्रश्न रहेको समेत बताए ।
अध्यक्ष यादवले संविधान जारी भएको ८ वर्ष वितिसकेको भन्दै आठवर्ष अगाडि त्रुटीपूर्ण भनेर संघीय प्रणालीसहित घोषणा गरिएको बताए । ‘त्यहि त्रुटीपूर्ण घोषणा गरिएको संविधानको प्रदेशहरुलाई अहिलेसम्म संघीय निजामति ऐन निर्माण गरिएन । संघीयता खारेज गर्नै परेन । यतैबाट खारेज गरिदिन्छन् कि जस्तो छ ।’
उनले आठ वर्षसम्म संघीय ऐन नबनाउनु, प्रहरी ऐन बनेको धेरैवर्ष भइसक्दा पनि कार्यान्वयन नहुनु, प्रदेशहरुलाई अधिकार, कानुन र कार्य गर्ने आवश्यक जनशक्ति समेत नदिने अवस्थाले कसरी संघीय गणतन्त्र टिक्छ र कसरी संस्थागत हुन्छ भन्ने गम्भीर प्रश्न रहेको छ ।’ उनले भने ।
अध्यक्ष यादवले संसदको चालु अधिवेशनले आर्थिक विधेयक, विनियोजित विधेयक, राष्ट्र ऋण उठाउने विधेयक, अनैतिक लेनदेन र एउटा गैरसकारी विधेयक मात्र पास गरेको बताउँदै नेपालको संसदीय इतिहासमा सबैभन्दा कम विधेयक पारित गर्ने यो अधिवेशन रहेको बताए ।
संसदीय समिति गठन गर्न नै आठ नौं महिना लाग्यो, गतिशील कसरी हुने ? अहिले सम्म संयुक्त संसदीय समिति बन्न सकेको छैन ।
वि.सं.२०८० कात्तिक १६ बिहीवार १५:५८ मा प्रकाशित
