हामी सबैकाे संसारन्यूज

काठमाडौँ । सत्तारुढ नेकपा माओवादी केन्द्रले संगठन सुदृढीकरणको लागि सञ्चालन गरेको चारमहिने विशेष रुपान्तरण अभियान सोमबारबाट सकिएको छ । अभियानको विषयमा आज माओवादीले पत्रकार सम्मेलन गरेर जानकारी गराउने तयारी गरेको छ ।

आज मंगलवार दिउँसो १ बजे पार्टी केन्द्रीय कार्यालय पेरिसडाँडामा पत्रकार सम्मेलन गरेर चार महिने विषेश रुपान्तरण अभियानको विषयमा जानकारी गराइने पार्टी प्रवक्ता अग्नी सापकोटाले जानकारी दिए । उनले माओवादीले सञ्चालन गरेको ४ महिने विशेष रुपान्तरण अभियानलगायत समसामयिक विषयमा विशेष पत्रकार सम्मेलन गर्न लागिएको बताएका छन् ।

माओवादी केन्द्रले गत भदौ १६ गतेदेखि देशभरका छ हजार सात सय ३४ वडामा तीन महिने अभियान सुरु गरेको थियो । जनताको उल्लेख्य सहभागिता रहेको भन्दै माओवादी केन्द्रले मंसिर १६ गते अभियान एक महिना थप गरेको थियो । अभियानका क्रममा पार्टी नेता कार्यकर्ता गाउँगाउँमा पुगेका थिए ।

देशका सातसय ५३ वटै पालिकामा बृहत् जनपरिचालनसहित सोमबार अभियान समापन गरेको माओवादीले आज विशेष पत्रकार सम्मेलन गरेर अभियानको विषयमा जानकारी दिन लागेको हो । अभियानको क्रममा पार्टीका बैठक, भेला, प्रशिक्षण, सदस्यता नवीकरण र विस्तार, अभिलेख व्यवस्थापन, उत्पादन लगायतका विषयमा छलफल भएको माओवादी केन्द्र प्रचार बिभागले जनाएको छ ।