हामी सबैकाे संसारन्यूज

काठमाडौं । गत आर्थिक वर्ष २०८९/८० मा सबैभन्दा धेरै रेमिट्यान्स भित्राएकोमा ग्लोबल आइएमई बैंक सम्मानित भएको छ । नेपाल राष्ट्र बैंकले उसलाई यो सम्मान गरेको हो ।

नेपाल राष्ट्र बैंकको ६९औँ वार्षिकोत्सवको अवसरमा गत आर्थिक वर्षमा सबैभन्दा बढी रेमिट्यान्स भित्र्याउने बैंक तथा वित्तीयसंस्थामध्ये ग्लोबल आईएमईएले सबैभन्दा बढी २१ दशमलव १ प्रतिशत रेमिट्यान्स भित्राएको थियो ।

गत शुक्रबार नेपाल राष्ट्र बैंक केन्द्रीय कार्यालय बालुवाटारमा आयोजित विशेष समारोहमा गभर्नर महाप्रसाद अधिकारीले बैंकका प्रमुख कार्यकारी अधिकृत रत्नराज बज्राचार्यलाई प्रशंसा–पत्र प्रदान गरेका थिए ।

विप्रेषण आप्रवाहले मुलुकको समष्टिगत आर्थिक स्थायित्व, सामाजिक आर्थिक सुधारलगायत बाह्य क्षेत्र सन्तुलन समेतमा योगदान पुर्‍यएकोले प्रशंसापत्र प्रदान गरिएको राष्ट्र बैंकले जनाएको छ ।

नेपाल राष्ट्र बैंकले आफ्नो वार्षिकोत्सवको अवसरमा सबैभन्दा धेरै रेमिट्यान्स भित्र्याउने बैंक तथा वित्तीय संस्थाहरुलाई सम्मानित गर्दै आएको छ ।

बैंकका बारे

ग्लोबल आइएमई बैंक मुलुकका सतहत्तरै जिल्लामा शाखा सञ्जाल रहेको निजी क्षेत्रको पहिलो वाणिज्य बैंक हो । देशभर बैंकको ३५४ शाखा, ३७९ एटिएम, २७७ शाखा रहित बैंकिङ्ग सेवा, ६८ एक्सटेन्सन तथा राजश्व संकलन काउन्टर तथा ३ वटा बैदेशिक प्रतिनिधि कार्यालय समेत गरी १,१०० भन्दा बढि सेवा केन्द्र रहेको बैंकले जनाएको छ ।

ग्लोबल आइएमई बैंक, सबैका लागि बैंकिङ्ग सेवा प्रदान गर्ने बैंक हो जसले विभिन्न सेवा तथा सुविधा सहितका योजना मार्फत आफ्ना ४६ लाख भन्दा बढी ग्राहकलाई, उत्कृष्ट सेवा प्रदान गरी लावान्भित गरिरहेको छ ।

बैंकले संयुक्त राज्य अमेरिका, संयुक्त अधिराज्य, क्यानडा, अष्ट्रेलिया, मलेसिया, दक्षिण कोरिया, जापान, साउदी अरब, कतार, युएई, बहराइन, कुवेत, भारत, जोर्डन, हङकङ लगायतका मुलुकबाट रेमिट्यान्स भित्र्याउँदै देशको अर्थ व्यवस्थामा महत्वपूर्ण योगदान पुयाउँदै आइरहेको बैंकद्वार जारी गरिएको विज्ञप्तिमा जनाईएको छ ।