काठमाडौँ । पर्वतको विहादी गाउँपालिका-६, शालिग्राम स्थित माझगाउँमा बृहत् सांस्कृतिक कार्यक्रमसहित भवन तथा खेलमैदान उद्घाटन एवं पुरुष भलिबल प्रतियोगिता हुने भएको छ ।
क्लबका अध्यक्ष प्रेम सोनी सुनारले विजयादशमी तथा शुभ दीपावलीको पावन अवसरमा पृथ्वी युवा क्लबको आयोजनामा यही आश्विन २८ गतेदेखि सांस्कृतिक कार्यक्रमसहित भवन उद्घाटन तथा पुरुष भलिबल प्रतियोगिता सुरु हुने जानकारी दिए ।
उनले आश्विन २८ गते सांस्कृतिक कार्यक्रमसहित क्लबको भवन उद्घाटन, वडा स्तरीय भलिबल प्रतियोगिताको उद्घाटन हुने बताए । उनले ३५ वर्ष उमेर समूह भन्दा तलका र माथिकाको छुट्टाछुट्टै प्रतियोगिता आयोजना गरिएको बताए ।
खेल संयोजक सुजल विश्वकर्माले पैत्तिस वर्ष भन्दा कम उमेर समूह अन्तर्गत भलिबल प्रतियोगितामा पहिलो हुनेले ५२ हजार, दोस्रो हुनेले ४२ हजार, तेस्रो हुनेले २४ हजार र सान्त्वना हुनेले १२ हजार प्राप्त गर्ने छन् भने सबै विजेता समूहले ट्रफि मेडल र प्रमाणपत्र प्राप्त गर्ने बताए । उनले ३५ वर्ष माथिको भलिबल प्रतियोगिताको विजेताले बोका र उपविजेताले पाठा प्राप्त गर्ने बताए ।
यस्तै कार्यक्रम संयोजक आर्जु सोनीका अनुसार खुल्ला नृत्य प्रतियोगितामा पहिलो हुनेले तीन हजार, दोस्रो हुनेले दुई हजार र तेस्रो हुनेले एक हजार रुपैयाँसहित प्रमाणपत्र प्राप्त गर्ने छन् ।
क्लबका सचिव सूर्यबहादुर विश्वकर्माले सुनारले कार्यक्रममा सहभागी भइदिनका लागि खेलाडी, समाजसेवी, शुभचिन्तक, आम सर्वसाधारण, सङ्घसंस्थाका प्रतिनिधि सबैलाई आग्रह गरेका छन् ।
वि.सं.२०८१ असोज १० बिहीवार १७:४५ मा प्रकाशित
