हामी सबैकाे संसारन्यूज

दोलखा । स्थानीय तह उपनिर्वाचन अन्तर्गत दोलखाको गौरीशंकर गाउँपालिकामा मतदान जारी छ । गौरीशंकमा हालसम्म २८ सय ८६ मत खसेको जिल्ला निर्वाचन कार्यालय दोलखाले जनाएको छ ।

गौरीशंकरमा उपाध्यक्ष पदका लागि ९ वटा वडाका १२ मतदान स्थलका २१ मतदान केन्द्रमा मतदान जारी रहेको जिल्ला निर्वाचन कार्यालय दोलखाका निमित्त जिल्ला निर्वाचन अधिकारी विशाल केसीले जानकारी दिए ।

पन्ध्र हजार सात सय १८ मतदाता रहेको गौरीशंकरमा बिहानैदेखि मतदाता मतदान केन्द्रमा धाइरहेका छन् । गौरीशंकर गाउँपालिकाको उपाध्यक्षमा २०७९ को स्थानीय तह निर्वाचनमा कांग्रेसबाट श्यामसुन्दर तामाङ निर्वाचित भएका थिए ।

उनको गतवर्ष निधन भएपछि आज उक्त पदमा नयाँ उपाध्यक्ष नियुक्तिको लागि मतदान भैरहेको हो। निर्वाचनमा ७ राजनीतिक दल र ९ जना स्वतन्त्र गरि १६ जना उम्मेदवार चुनावी प्रतिस्पर्धामा छन्। बिहान ७ बजेदेखि ९ वटै वडाको २१ मतदान केन्द्रमा शान्तिपूर्ण वातावरणमा मतदान भैरहेको केसीले बताए।