हामी सबैकाे संसारन्यूज

काठमाडौं । पूर्वराष्ट्रपति विद्यादेवी भण्डारीले नेकपा एमालेको अध्यक्ष बन्नकै लागि पार्टीमा फर्किएको बताएकी छन् । एक टेलिभिजनसँग कुराकानीमा उनले अबको आफ्नो लक्ष्य पार्टीको आगामी नेतृत्व (अध्यक्ष) बन्नु रहेको बताएकी हुन् ।

बिहीबार इमेज टेलिभिजनका पत्रकार जगदीश खरेलले लिएको अन्तर्वार्तामा भण्डारीले आफूले सरकारी सेवा–सुविधा परित्याग गर्दै राष्ट्र र पार्टीको हितका लागि राजनीतिमा फर्किएको जानकारी दिइन् । ‘यो सबै गर्नका लागि तपाईँ एमालेको अध्यक्ष बन्नुपर्छ भन्ने हो ?’ भनेर सोधिएको प्रश्नमा भण्डारीले भनिन्, ‘हो’ ।

एमालेको राजनीतिमा सक्रिय भएकी उनले भनिन्, ‘व्यक्तिगत पदलोलुपता वा महत्वाकांक्षा होइन, राष्ट्रिय आवश्यकताका विषयमा सक्रिय हुन खोजेकी हुँ ।’ भण्डारीले केही साताअघि मात्रै सक्रिय राजनीतिमा फर्किएको घोषणा गरेको थिइन् । उनी एमालेको राजनीतिमा सक्रिय भएसँगै ‘भावी अध्यक्ष’का रुपमा चर्चा चलिरहेको छ ।