नवलपुर । सरकारी जग्गामा व्यक्तिले रजाइँ गरेको पाइएपछि नवलपुरको देवचुली नगरपालिकाले उक्त जग्गा खाली गर्न अल्टिमेटम दिएको छ । नगरपालिकाले विहीबार एक सूचना जारी गर्दै आगामी कार्तिक मसान्त सम्ममा उक्त जग्गा खाली गर्न अल्टिमेटम दिएको हो ।
केही व्यक्तिहरूले देवचुली नगरपालिका अन्तर्गत साविक प्रगतिनगर गाउँ पञ्चायत, वडा नं ३ (क), कित्ता नं ९१ (क्षेत्रफल ४ ३ १३.२५०) प्रगतिनगर गाँउ पञ्चायतको नाममा दर्ता कायम भएको सरकारी जग्गा प्रयोग गर्दै आएको पाइएको छ ।
उक्त जग्गा स्थानीय सरकार संचालन ऐन २०७४ को दफा ११ (२) बमोजिम नगरपालिकाले संरक्षण गर्ने असार १३ गतेको ८० औ कार्यपालिका बैठकबाट निर्णय समेत भएको थियो ।
उक्त जग्गा प्रयोग गर्दै आएका सम्पूर्ण व्यक्तिहरुले कार्तिक मसान्त सम्म जग्गा खाली गर्न सूचना प्रकाशित गर्दै तोकिएकोे समय भित्र जग्गा खाली नगरे प्रचलित कानुन बमोजिम जाने नगरपालिकाले चेतावनी समेत दिएको छ ।
यता नगरपालिकाका प्रमुख हरि प्रसाद न्यौपानेले संसार न्यूजसँग कुरा गर्दै जग्गा खाली गराउने मामिलामा कुनैपनि हालतमा पछि नहट्ने बताएका छन् ।
वि.सं.२०८२ भदौ ५ बिहीवार १३:१३ मा प्रकाशित
