ज्ञानेन्द्र ठाकुर
जनकपुरधाम । सर्लाही प्रहरीले लागूऔषधसहित एक युवकलाई पक्राउ गरेको छ। प्रहरीले क्षिरेश्वर नगरपालिका–३ का २० वर्षीय नन्दु सहनीलाई ब्राउन सुगरसहित नियन्त्रणमा लिएको हो।
ईलाका प्रहरी कार्यालय खजुरी अन्तर्गतको ठाढिझिझा प्रहरी चौकीबाट खटिएको टोलीले सोमबार दिउँसो सहनीलाई पक्राउ गरेको हो। प्रहरीका अनुसार सहनीको साथबाट ९ ग्राम १८० मिलिग्राम तौलको ब्राउन सुगरजस्तो देखिने धुलो पदार्थ बरामद गरिएको छ।
पक्राउ परेका सहनीलाई ईलाका प्रहरी कार्यालय खजुरीको हिरासतमा राखी थप अनुसन्धान भइरहेको प्रहरीले जनाएको छ। प्रारम्भिक अनुसन्धानका क्रममा उनले सो पदार्थ भारतबाट ल्याएको हुन सक्ने आशंका प्रहरीले गरेको छ।
सर्लाही प्रहरीले हालै सिमानाक्षेत्र हुँदै हुने लागूऔषध तस्करी नियन्त्रणका लागि विशेष अभियान सञ्चालन गरेको छ। सोही अभियानअन्तर्गत पछिल्लो समय विभिन्न ठाउँमा कडा चेकजाँच र निगरानी बढाइएको प्रहरी स्रोतले जनाएको छ ।
वि.सं.२०८२ असोज २७ सोमवार १०:३८ मा प्रकाशित
