हामी सबैकाे संसारन्यूज

काठमाडौं। पूर्व प्रहरी अतिरिक्त महानिरीक्षक देवेन्द्र सुवेदीविरुद्ध नेपाल प्रहरीले साइबर अपराधसम्बन्धी उजुरी दर्ता गरेको छ।

नेकपा (माओवादी केन्द्र)का संयोजक पुष्पकमल दाहाल ‘प्रचण्ड’को सचिवालयका तर्फबाट दिइएको उजुरीमा सुवेदीले सामाजिक सञ्जालमार्फत तथ्यहीन र भ्रमपूर्ण प्रचारप्रसार गरेको आरोप लगाइएको छ।

उजुरीका अनुसार सुवेदीले प्रचण्डको निवासमा आगलागी हुनुभन्दा दुई दिनअघि नै “दुई वटा ट्रकमा दुई करोड रुपैयाँ लगेर लुकाइएको” भनी पूर्ण रूपमा गलत र मनगढन्ते सामग्रीहरू सामाजिक सञ्जालमा प्रसारित गराएका थिए।

सचिवालयले उजुरीमार्फत भनेको छ — “यसरी डिजिटल माध्यम प्रयोग गरी भ्रम सिर्जना गर्नु र पार्टी नेतृत्वको चरित्रहत्या गर्नु गम्भीर साइबर अपराध हो।”

सो उजुरी नेपाल प्रहरीको साइबर ब्यूरो, काठमाडौंमा हिजो दर्ता गरिएको हो। उजुरीमा डिजिटल माध्यममार्फत गरिएको यस्तो गलत प्रचारप्रसार साइबर कानुनविपरीत भएको भन्दै आवश्यक अनुसन्धान गरी कानुनी कारबाही गर्न माग गरिएको छ।