हामी सबैकाे संसारन्यूज

काठमाडौं । नेकपा (एमाले)को जारी केन्द्रीय कमिटीको १०औं बैठकमा पूर्वराष्ट्रपति विद्या भण्डारीको पार्टी सदस्यता नवीकरण गर्न माग उठेको छ । बैठकको दोस्रो दिन संगठन विभागका सचिव माधव ढुङ्गेलले लिखित प्रस्तावसहित भण्डारीको सदस्यता पुनःनवीकरण गर्न आग्रह गरेका हुन् ।

रचना खड्का, रमेश पौडेल, विद्या सुन्दर शाक्य, युवराज बास्कोटा, रविन कोइराला, रामलाल साह र ममता गिरीलगायत सदस्यहरूले पनि सोही माग राखेका छन् । उनीहरूले अध्यक्ष केपी शर्मा ओलीलाई अभिभावकको भूमिका निभाउँदै पार्टीलाई एकताबद्ध बनाउन सुझाव दिएका छन् ।

जेनजी आन्दोलनपछि पार्टीमा युवा पुस्ताको सहभागिता बढाउनुपर्नेमा जोड दिँदै रचना खड्काले नीति र विधानमा पुनर्संरचना आवश्यक रहेको बताइन् । त्यस्तै, रमेश पौडेलले माधव नेपालको समाजवादी पार्टीलाई एमालेमा एकीकरण गर्न र भण्डारीको सदस्यता पुनःनवीकरण गर्न माग गरे ।

बैठकमा पार्टीका राम्रा–नराम्रा कामको श्वेतपत्र सार्वजनिक गर्नुपर्ने प्रस्ताव पनि आएको छ । नेतृत्व परिवर्तनको विषयमा छलफल भए पनि अधिकांश सदस्यहरू आगामी महाधिवेशनबाट नै निर्णय गर्ने पक्षमा उभिएका छन् । एमालेले मङ्सिरको अन्तिम साता पोखरामा महाधिवेशन गर्ने तयारी गरेको छ ।