हामी सबैकाे संसारन्यूज

सप्तरी । सप्तरीको बोदेबर्साइन नगरपालिका–८ काचनको रजकपट्टीस्थित कबिर बाबा मन्दिरका पुजारी रामदुलार साहको गोली हानी हत्या गरिएको छ ।

७३ वर्षीय साहलाई अज्ञात समूहले आइतबार बिहान करिब २ बजे गोली प्रहार गरेको प्रहरीले जनाएको छ । गाउँको पूर्वतर्फ रहेको मन्दिरमा कुटी बनाएर एक्लै बस्दै आएका पुजारीलाई सडकमा निकालेर पिठ्युँतर्फ गोली हानेर हत्या गरिएको परिवारका सदस्य रामसुन्दर साहले बताए ।

घटनास्थलबाट दुईवटा गोलीका खोका फेला परेका छन् । शवलाई परीक्षणका लागि धरानस्थित बिपी कोइराला स्वास्थ्य विज्ञान प्रतिष्ठान पठाइएको सप्तरीका प्रहरी प्रमुख प्रहरी उपरीक्षक गौतमकुमार केसीले जानकारी दिए ।

प्रहरीले घटनाको विस्तृत अनुसन्धान सुरु गरेको जनाएको छ ।