हामी सबैकाे संसारन्यूज

काठमाडौं । काग तिहारको दिन कलाकार रमेश दुलाल ‘कागे’ले राजधानीको नारायणहिटी दरबार संग्रहालय अगाडि २२औँ काग सम्मेलन सम्पन्न गरेका छन् ।

टप राजधानी रोधी र ग्रीनसिटी अस्पताल वसुन्धाराको सहआयोजनामा गरिएको कार्यक्रममा दुलालले आफ्नो अद्भुत कला प्रस्तुत गर्दै कागहरूलाई आकर्षित गरेका थिए । बिहान पौने ६ बजे सुरु भएको कार्यक्रममा उहाँले कागको आवाज निकाल्नेबित्तिकै दर्जनौं कागहरू भेला भएका थिए ।

दुलालले कागसहित १७३ प्रजातिका जनावर र चराचुरुङ्गीका आवाज नक्कल गर्न सक्छन् । मुखकै सहायताले मादल, सनाई, सारङ्गी, पियानो, ड्रम सेट, मुर्चुङ्गा र गितारका धुन निकाल्ने उनको कला पनि निकै चर्चित छ ।

उनी विगतका वर्षहरूमा रत्नपार्क, विमानस्थल परिसर र अन्य स्थानमा पनि ‘काग सम्मेलन’ गर्दै आएका छन् । दुलालका अनुसार, “काग तिहारको दिन काग सम्मेलन गर्न थालेको अहिले २२ वर्ष भयो । कागलाई यमराजको दूतका रूपमा मानिन्छ, त्यसैले यसपटक सांस्कृतिक सन्देशसहित यो सम्मेलन गरेको हुँ ।”

काग तिहारको धार्मिक र सांस्कृतिक महत्व जोगाउन र जनचेतना फैलाउन गरिएको यो कार्यक्रममा उपस्थित दर्शकहरूले उनको कला र योगदानको प्रशंसा गरेका छन् ।

कार्यक्रमको मुख्य प्रायोजक मोर्डन राप्ती रियल स्टेट र भरत विश्वकर्मा थिए भने सहप्रायोजकमा ह्याम्स हस्पिटल, शङ्करप्रसाद आचार्य, चुडा मैनाली, होराइजन स्पा, नौकरी नेपाल र शान्ति तथा ग्रामीण विकास केन्द्र नेपाल रहेका थिए ।