हामी सबैकाे संसारन्यूज

काठमाडौं । मन्त्रिपरिषद्मा आज थपिने चार जना मन्त्रीहरूको शपथ साढे २ बजे राष्ट्रपति कार्यालय शीतल निवासमा हुने भएको छ। प्रधानमन्त्री सुशीला कार्कीले पठाएका नाममा डा. सुधा शर्मा गौतम, गणपतिलाल श्रेष्ठ, खगेन्द्र सुनार र बब्लु गुप्ता रहेका छन्।

डा. गौतमलाई स्वास्थ्य तथा जनसंख्या, खगेन्द्र सुनारलाई श्रम तथा रोजगार, बब्लु गुप्तालाई युवा तथा खेलकुद र गणपतिलाल श्रेष्ठलाई भूमिसुधार मन्त्रालयको जिम्मेवारी तोकिएको छ। श्रेष्ठलाई पहिले संस्कृति, पर्यटन तथा नागरिक उड्डयन मन्त्रालयको जिम्मेवारी दिन तय गरिएको भए पनि अन्तिममा भूमिसुधार मन्त्रालयमा पठाइएको प्रधानमन्त्री कार्यालय स्रोतले जनाएको छ।

डा. शर्मा पूर्व स्वास्थ्य सचिव र स्त्री तथा प्रसूति रोग विशेषज्ञ हुन्। गणपतिलाल सम्पदा संरक्षण अभियन्ता हुन् भने खगेन्द्र सुनार दलित अधिकारकर्मी र बब्लु गुप्ता सामाजिक अभियन्ता हुन्। यीमध्ये गणपतिलाल श्रेष्ठ र बब्लु गुप्ता ‘अनलाइनखबर’ले छनोट गरेको ४० वर्षमुनिका ४० प्रभावशाली युवाको सूचीमा समेत परेका छन्।