हामी सबैकाे संसारन्यूज

काठमाडौँ । महाराजगन्जमा भएको प्रदर्शनका क्रममा प्रहरीमाथि भएको आक्रमणमा संलग्न भएको आरोपमा थप पाँच जनालाई पक्राउ गरिएको छ। उक्त घटनामा असई मिलन राय र प्रहरी जवान उत्तम थापाको ज्यान गएको थियो।

प्रहरीका अनुसार पक्राउ पर्नेमा गोरखा घर भएका २१ वर्षीय सोम गुरुङ, तनहुँका २१ वर्षीय राजीव गुरुङ, २१ वर्षीय युनिक श्रेष्ठ, सर्लाहीका १७ वर्षीय सुमित तितुङ र रामेछापका १६ वर्षीय दीपक मगर रहेका छन्। उनीहरूलाई काठमाडौँको भद्रकालीस्थित जिल्ला प्रहरी परिसरमा राखी अनुसन्धान भइरहेको छ।

प्रहरीको प्रारम्भिक अनुसन्धानअनुसार, ती पाँच जनाले कुटपिटमा संलग्न रही महाराजगन्जमा कार्यरत दुई प्रहरीको हत्या गरेको देखिएको छ।

यसअघि सोही घटनामा संलग्न आरोपमा पक्राउ परेका युवराज क्याप्छाकी, सोनाम तामाङ (बुद्धिलाल थिङ), होमप्रसाद पौडेल र टिकाराम बिकलाई अदालतको आदेशमा पुर्पक्षका लागि कारागार चलान गरिएको थियो।

अनुसन्धानले काभ्रेको रोशी गाउँपालिका घर भएका र हाल बालुवाटार बस्ने २८ वर्षीय क्याप्छाकी र मकवानपुरको थाहा नगरपालिका–७ घर भई चन्द्रागिरी बस्ने २१ वर्षीय थिङले जवान उत्तम थापामाथि कुटपिट गरेको देखाएको छ।

त्यसैगरी, सिन्धुपाल्चोक त्रिपुरासुन्दरी गाउँपालिका–४ का ६२ वर्षीय होमप्रसाद पौडेल र उदयपुर चौदण्डीगढी–१० का २८ वर्षीय टिकाराम विकले असई मिलन रायमाथि आक्रमण गरी हत्या गरेको अनुसन्धानबाट खुलेको प्रहरीले जनाएको छ।

जिल्ला प्रहरी परिसर काठमाडौँका एसपी पवन भट्टराईका अनुसार, पछिल्ला पाँच जनामाथि पनि अनुसन्धान सकिएपछि पूरक प्रतिवेदन अदालतमा पेश गरिनेछ।