Sansar News
काठमाडौं । अन्डाको मूल्य बढेको छ । नेपाल लेयर्स कुखुरापालक सङ्घले आज सोमबारदेखि लागु हुने गरी अन्डाको मूल्य बढाएको हो । उत्पादन घटेको र खपत बढेको भन्दै सङ्घले फेरि अन्डाको भाउ बढाएको छ । सङ्घका अनुसार अब भाउ बढेसँगै ठूलो अन्डाको मूल्य प्रतिक्रेट ५ सय रुपैयाँ र मध्यम अन्डाको ४ सय ५० रुपैयाँ पुगेको बताए ।
अघिल्लो दरको तुलनामा प्रतिक्रेटमा ५० रुपैयाँ भाउ बढाइएको हो । यो मूल्यवृद्धि चितवनलाई आधार बनाएर निर्धारण गरिएको हो । उपभोक्ताका लागि एउटा अन्डाको खुद्रा मूल्य भने २२ रुपैयाँकै हाराहारीमा रहेको र उपभोक्ता मूल्यमा त्यति ठूलो फरक नपर्ने सङ्घले जनाएको छ ।
उत्पादकले होसलसेल (थोक) मा बेच्ने भाउ बढाएपछि होलसेलरले व्यापारीलाई नै महँगोमा अन्डा बेच्छन् । यसो हुँदा उपभोक्ताले महँगोमा अन्डा किन्नुपर्ने हुन्छ ।
वि.सं.२०८२ कात्तिक १० सोमवार १३:४५ मा प्रकाशित
