हामी सबैकाे संसारन्यूज

काठमाडौं । नेकपा एमालेको नयाँ नेतृत्व चयनका लागि सम्पन्न निर्वाचनमा केपी शर्मा ओली विजयी भएका छन्। पार्टीको अध्यक्ष पदका उम्मेदवार ओलीले आफ्ना प्रतिस्पर्धी ईश्वर पोखरेललाई फराकिलो मतान्तरले पराजित गरेका हुन्।

निर्वाचन आयोगले सार्वजनिक गरेको पछिल्लो विवरणअनुसार अध्यक्ष पदका उम्मेदवार केपी शर्मा ओलीले कुल १ हजार ६ सय ६३ मत प्राप्त गरेका छन्। उनका प्रतिस्पर्धी उम्मेदवार ईश्वर पोखरेलले ५ सय ६४ मतमा सीमित भएका छन्। मतगणना सम्पन्न भइसकेको भए पनि औपचारिक रूपमा परिणाम घोषणा हुन भने बाँकी रहेको आयोगले जनाएको छ।

यस निर्वाचनलाई एमालेको आन्तरिक राजनीतिमा महत्वपूर्ण मानिएको छ। निर्वाचन परिणामले आगामी दिनमा पार्टीको नीति, रणनीति तथा संगठनात्मक संरचनामा ओलीको प्रभाव कायम रहने संकेत गरेको छ।

पार्टीको नेतृत्व चयनका लागि देशभरबाट प्रतिनिधिहरू सहभागी भएका थिए। निर्वाचन शान्तिपूर्ण रूपमा सम्पन्न भएको र कुनै अप्रिय घटना नघटेको निर्वाचन समितिले जनाएको छ। औपचारिक घोषणा पछि नयाँ नेतृत्वले सपथ ग्रहण गर्ने कार्यक्रम तय हुने बताइएको छ।