Sansar News
काठमाडौँ । मुक्तिनाथ कृषि कम्पनी लिमिटेडले हाल कायम चुक्ता पूँजी रुपैयाँ ७५ करोड ६० लाख बराबरको प्रति शेयर रुपैयाँ एक सय अंकित दरका ७५ लाख ६० हजार कित्ता साधारण शेयरको एक बराबर शून्य दशमलव छ (अर्थात् विद्यमान एक कित्ता साधारण शेयर बराबर नयाँ शून्य दशमलव छ कित्ता साधारण शेयर) को अनुपातमा रुपैयाँ ३५ करोड ३६ लाख बराबरको प्रति शेयर रुपैयाँ एक सय अंकित दरका ३५ लाख ३६ हजार कित्ता हकप्रद साधारण शेयर निष्काशन गर्ने भएको छ। सो प्रयोजनका लागि कम्पनीले निष्काशन तथा बिक्री प्रबन्धकमा नेपाल लाइफ क्यापिटल लिमिटेडलाई नियुक्त गरेको हो।
पौष तीन गते बिहीबार मुक्तिनाथ कृषि कम्पनी लिमिटेडको बसुन्धारा, काठमाडौंस्थित कार्यालयमा सम्पन्न एक कार्यक्रममा कम्पनीले नेपाल लाइफ क्यापिटल लिमिटेडलाई औपचारिक रूपमा शेयर निष्काशन तथा बिक्री प्रबन्धकमा नियुक्त गरेको हो।
सम्झौता पत्रमा मुक्तिनाथ कृषि कम्पनी लिमिटेडका तर्फबाट नायब प्रमुख कार्यकारी अधिकृत रामशरण तिमल्सिना तथा नेपाल लाइफ क्यापिटल लिमिटेडका तर्फबाट प्रमुख कार्यकारी अधिकृत मनिष घिमिरेले हस्ताक्षर गरेका छन्।
मुक्तिनाथ कृषि कम्पनी लिमिटेड नेपालको कृषि क्षेत्रको व्यवसायिक विकासका लागि कृषक र उपभोक्तालाई जोड्ने संस्थागत मूल्य श्रृंखला व्यवस्थापकको रूपमा कार्यरत अग्रणी कम्पनी हो।
कम्पनीले कृषकहरूका लागि आवश्यक उत्पादनका साधनको उपलब्धता, परामर्श सेवा, प्रविधि प्रसार, प्रशोधन उद्योगको विकास तथा उपभोक्तालाई स्वस्थ, गुणस्तरीय र पोषिलो कृषि उत्पादन उपलब्ध गराउने व्यवसाय गर्दै आएको छ।
नेपाल लाइफ इन्स्योरेन्स कम्पनी लिमिटेडको सहायक कम्पनी नेपाल लाइफ क्यापिटल लिमिटेड धितोपत्र बोर्डबाट लगानी व्यवस्थापन, धितोपत्र प्रत्याभूति, निक्षेप सदस्य सेवा, योजना व्यवस्थापक, डिपोजिटरी सेवा, संस्थागत परामर्श, शेयर रजिष्ट्रेशन तथा निष्काशन र बिक्री प्रबन्ध गर्ने अनुमति प्राप्त मर्चेन्ट बैंकिङ संस्था हो।
वि.सं.२०८२ पुस ८ मंगलवार ११:४७ मा प्रकाशित
