हामी सबैकाे संसारन्यूज

काठमाडाैँ । सुनसरीको लौकहीबजार क्षेत्रमा तनावपूर्ण अवस्था सिर्जना भएको छ। सशस्त्र प्रहरीको गोली लागेर एक स्थानीयको मृत्यु भएपछि आक्रोशित स्थानीयवासी सडकमा उत्रिएका छन्।

गएराति करिब १ बजे कोशी गाउँपालिका–१ अन्तर्गत पुरी टोलमा तस्करी नियन्त्रणका लागि खटिएको सशस्त्र प्रहरी टोलीले गोली चलाउँदा ४५ वर्षीय विजय साहको मृत्यु भएको हो। साह सिटी सफारी चालक रहेको जनाइएको छ।

घटनापछि आक्रोशित स्थानीयवासीले पूर्व–पश्चिम राजमार्ग अवरुद्ध गर्नुका साथै सशस्त्र प्रहरी बिटमा आगजनी गरेका छन्। भीड नियन्त्रण गर्न सुरक्षाकर्मीले हवाई फायरसमेत गरेको बताइएको छ।

सशस्त्र प्रहरीले सिटी सफारीमार्फत राति तस्करीको सामान ल्याइँदै गरेको आशंकामा रोक्न खोज्दा सुरक्षाकर्मीमाथि आक्रमणको प्रयास भएपछि गोली चलाउनु परेको दाबी गरेको छ।

जिल्ला प्रहरी कार्यालय सुनसरीका प्रवक्ता चन्द्रबहादुर खड्काले गोली लागेर विजय साहको मृत्यु भएको पुष्टि गर्दै घटनाबारे थप अनुसन्धान भइरहेको जानकारी दिए। मृतक साहको शव अझै उठाउन नदिएको स्थानीयवासीले टायर बालेर प्रदर्शन गरिरहेका छन्।

क्षेत्रमा थप अप्रिय घटना हुन नदिन सुरक्षाकर्मीको उपस्थिति बढाइएको छ।