हामी सबैकाे संसारन्यूज

सिरहा । जिल्ला सिरहाको कर्जन्हा नगरपालिकामा घटेको बालिका हत्या घटनामा संलग्न अभियुक्तलाई प्रहरीले पक्राउ गरेको छ। मिति २०८२।०८।२२ गते अपराह्न करिब १४:४५ बजे कर्जन्हा नगरपालिका–०२ स्कुल टोलस्थित कमला सिँचाइ नहरबाट करिब १५–२० मिटर उत्तरतर्फको झाडीमा कर्जन्हा नगरपालिका–०१ बाल्टिया बस्ने अन्दाजी १७ वर्षीया बालिकाको मृत शरीर फेला परेको थियो।

उक्त घटनाको गम्भीरतापूर्वक अनुसन्धान गर्दै नेपाल प्रहरी प्रधान कार्यालय, केन्द्रीय अनुसन्धान ब्यूरो, मधेश प्रदेश प्रहरी कार्यालय जनकपुर, जिल्ला प्रहरी कार्यालय सिरहा, इलाका प्रहरी कार्यालय मिर्चैया तथा इलाका प्रहरी कार्यालय बन्दिपुर, सिरहाबाट खटिएको संयुक्त अनुसन्धान टोलीले सूक्ष्म अनुसन्धान पश्चात घटनामा संलग्न व्यक्तिको पहिचान गरेको हो।

अनुसन्धानका क्रममा जिल्ला धनुषा छिरेश्वरनाथ नगरपालिका–०३ बटैया टोल बस्ने ४५ वर्षीय राम बालक चौधरीले बालिकामाथि करणी गरी हत्या गरेको खुल्न आएको प्रहरीले जनाएको छ। अभियुक्त चौधरीलाई मिति २०८२।०९।२१ गते पक्राउ गरिएको हो।

पक्राउ परेका अभियुक्तमाथि आवश्यक थप अनुसन्धान कार्य इलाका प्रहरी कार्यालय मिर्चैया, सिरहाबाट भइरहेको जिल्ला प्रहरीले जानकारी दिएको छ।