हामी सबैकाे संसारन्यूज

काठमाडौं । नेकपा एमाले र नेपाली कम्युनिस्ट पार्टी (नेकपा) बीच सातै प्रदेशमा सत्ता सहकार्य गर्ने सहमति भएको छ। शनिबार एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ले तीन बुँदे लिखित सहमतिपत्रमा हस्ताक्षर गर्दै प्रदेश सरकार गठन र सञ्चालनमा सहकार्य गर्ने निर्णय गरेका हुन्।

सहमतिअनुसार कोशी, बागमती र लुम्बिनी प्रदेश सरकारको नेतृत्व नेकपा एमालेले गर्नेछ भने कर्णाली र सुदूरपश्चिम प्रदेशको नेतृत्व नेकपाले गर्ने सहमति भएको छ।

यद्यपि मधेश र गण्डकी प्रदेशको नेतृत्वबारे भने तत्काल टुंगो लाग्न सकेको छैन। सहमतिपत्रमा ती दुई प्रदेशमा प्रदेशसभामा प्रतिनिधित्व गर्ने अन्य राजनीतिक दलहरूसँग परामर्श गरेर सरकारको नेतृत्व र सहभागिताको स्वरूप तय गरिने उल्लेख गरिएको छ।

यससँगै दुई दलबीच प्रदेश सरकारमा सत्ता साझेदारीको औपचारिक प्रक्रिया अघि बढेको छ। सहमतिलाई आगामी राजनीतिक सहकार्यको आधारका रूपमा पनि हेरिएको छ।