हामी सबैकाे संसारन्यूज

काठमाडौं । भोटेकोशी बाढीपछि प्रभावित जिल्लाका मुख्य सडकहरू अझै पूर्ण रूपमा सञ्चालनमा नआएपछि सरकारले सञ्चालनमा आएका वैकल्पिक सडकमार्ग प्रयोग गर्न सर्वसाधारणलाई आग्रह गरेको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अत्यावश्यक हवाई उद्धार आवश्यक नपर्ने, कम प्रभावित वा सुरक्षित स्थानमा रहेका व्यक्तिहरूले हेलिकोप्टर उद्धारको माग नगरी उपलब्ध वैकल्पिक सडकमार्ग प्रयोग गर्नुपर्नेछ।

प्राधिकरणले रसुवा र धादिङ जोड्ने वैकल्पिक मार्गहरू सार्वजनिक गर्दै सीमित हेलिकोप्टरलाई अत्यावश्यक खोज, उद्धार तथा राहत सामग्री ढुवानीमा प्रयोग गर्न सहयोग गर्न आग्रह गरेको हो।

रसुवा जाने वैकल्पिक मार्ग
नुवाकोटको विदुर–ढिकुरे–चौघडा–आप्र–नर्जा–लच्याङ–सरमर्थाले–पाटीखर्क हुँदै बोगटीटार–कालिकास्थान–धुन्चे पुग्न सकिनेछ। यो मार्गमा चार पाङ्ग्रे साना सवारीसाधन सञ्चालनमा आएका छन्।

धादिङ जाने वैकल्पिक मार्ग भने हाल अवरुद्ध
धादिङबेसी–परेवाटार–नेपालटार–गजुरीटार–पिपलटार–आदमटार–बेलिनटार–केउरिनीटार हुँदै मास्टारस्थित ह्याम्लेट रेष्टुरेन्टबाट पृथ्वी राजमार्ग जोडिने वैकल्पिक सडक सञ्चालनमा आएको भए पनि परेवाटारमा सडक भासिएपछि हाल दुईतर्फी रूपमा बन्द भएको छ। यसको नयाँ वैकल्पिक मार्ग भने अहिलेसम्म तय भएको छैन।

प्राधिकरणले विनाशकारी बाढीपछि रसुवा, नुवाकोट, धादिङ, गोरखा र तनहुँका विभिन्न क्षेत्र प्रभावित भएको जनाएको छ। प्रभावित क्षेत्रबाट हालसम्म २५२ जना विदेशी र ३ हजार ३४४ जना नेपाली गरी ३ हजार ५९६ जनाको हवाई उद्धार भइसकेको छ।

आपत्कालीन अवस्थामा स्रोतसाधन सीमित हुने भएकाले अत्यावश्यक उद्धारमा मात्र हेलिकोप्टर प्रयोग हुने वातावरण बनाउन प्राधिकरणले सम्बन्धित सबैलाई आग्रह गरेको छ।

प्राधिकरणले बढी प्रभावित क्षेत्रका बासिन्दालाई अनावश्यक जोखिम नलिन र सडकमार्ग प्रयोग गर्नुअघि सम्बन्धित निकायबाट बाटोको पछिल्लो अवस्था बुझ्नसमेत आग्रह गरेको छ।