हामी सबैकाे संसारन्यूज

काठमाडौं । नेपाल टेलिकमले आफ्नो Value Added Services (VAS) प्रणालीअन्तर्गत एसएमएसमा आधारित सेवामार्फत प्रवाह भइरहेका राजनीतिक प्रकृतिका सन्देशहरू रोकिएको स्पष्ट पारेको छ। कम्पनीले केही सेवा प्रदायकहरूले आफ्नो व्यापारिक व्यवस्थाभन्दा फरक राजनीतिक सन्देशहरू नेपाल टेलिकमका विभिन्न मोबाइल नम्बरहरूमा प्रवाह गरिरहेको पाइएको जनाउँदै उक्त कदम चालिएको जनाएको छ।

नेपाल टेलिकमले विभिन्न व्यापारिक तथा सेवा प्रवर्द्धनका लागि एसएमएस प्रवाह गर्न सेवा प्रदायकहरूलाई स्वीकृति दिँदै आएको भए पनि सेवा प्रदायकका व्यक्तिगत मोबाइल नम्बर वा अन्य विवरण आफूले उपलब्ध नगराएको स्पष्ट गरेको छ।

प्रेस विज्ञप्तिमा उल्लेख गरिएअनुसार सम्बन्धित सेवा प्रदायकहरूले जातीय, वर्गीय, धार्मिक, सामाजिक तथा राजनीतिक सद्भावमा खलल पुर्‍याउने खालका सन्देशहरू प्रवाह गरिरहेको पाइएको छ। यस्तो गतिविधि आम नागरिकका लागि संवेदनशील र आपत्तिजनक हुन सक्ने भन्दै नेपाल टेलिकमले आगामी दिनमा यस्ता सन्देश सर्वसाधारणमा प्रवाह नगर्न सम्बन्धित सेवा प्रदायकहरूलाई निर्देशन दिएको छ।

नेपाल टेलिकमले सेवाग्राहीको गोपनीयतालाई सधैँ उच्च प्राथमिकतामा राख्दै आएको उल्लेख गर्दै आगामी दिनमा पनि गोपनीयताको सम्मान गर्ने प्रतिबद्धता दोहोर्‍याएको छ।

कम्पनीले सेवाग्राहीको हित, सामाजिक सद्भाव र जिम्मेवार सञ्चार प्रणालीको प्रवर्द्धनमा आफू प्रतिबद्ध रहेको समेत जनाएको छ।