हामी सबैकाे संसारन्यूज

काठमाडौं । जेनजी २.० ले आगामी निर्वाचन स्वच्छ, शान्तिपूर्ण र मर्यादित वातावरणमा सम्पन्न गर्न आग्रह गरेको छ। शनिबार एक विज्ञप्ति जारी गर्दै उसले यस्तो आह्वान गरेको हो।

विज्ञप्तिमा निर्वाचन लोकतन्त्रको आधार स्तम्भ भएकाले स्वस्थ प्रतिस्पर्धा, नीति तथा कार्यक्रमको बहस र विचारको प्रतिस्पर्धा हुनुपर्ने उल्लेख गरिएको छ। व्यक्तिगत आरोप–प्रत्यारोप, उत्तेजनात्मक अभिव्यक्ति, घृणा फैलाउने गतिविधि तथा हिंसात्मक प्रवृत्तिबाट टाढा रहन आग्रह गरिएको छ।

मतदाताको निर्णय सर्वोपरी रहेको स्पष्ट पार्दै मतदातालाई भय, दबाब, प्रलोभन वा भ्रममा पार्ने गतिविधि नगर्न सचेत गराइएको छ। निर्वाचन आचारसंहिताको कडाइका साथ पालना हुनुपर्ने र अभिव्यक्ति स्वतन्त्रताको सम्मान गर्दै सबै पक्षलाई समान अवसर सुनिश्चित गरिनुपर्ने उल्लेख गरिएको छ।

संस्थाका प्रवक्ता अविन लिम्बुले शान्त, निष्पक्ष र पारदर्शी वातावरणमा निर्वाचन सम्पन्न हुनु आवश्यक रहेको बताएका छन्।