हामी सबैकाे संसारन्यूज

काठमाडौं । पेशागत महासंघ नेपालले सब–इन्जिनियर प्रमोद यादवको हत्या प्रकरणमा संलग्न दोषीमाथि तत्काल कडा कारबाही गर्न सरकारसँग माग गरेको छ।

महासंघद्वारा जारी प्रेस विज्ञप्तिअनुसार २०८२ साल फागुन ३ गते साँझ भौतिक पूर्वाधार विकास कार्यालय, मलङ्गवा, सर्लाहीमा कार्यरत सब–इन्जिनियर प्रमोद यादवमाथि गोली प्रहार गरी हत्या गरिएको घटनाप्रति गम्भीर ध्यानाकर्षण भएको जनाएको छ। कार्यालय परिसरमै कार्यरत राष्ट्रसेवक कर्मचारीमाथि भएको आक्रमणले सम्पूर्ण कर्मचारीतन्त्रको सुरक्षामाथि गम्भीर प्रश्न उठाएको महासंघको भनाइ छ।

महासंघले स्वर्गीय यादवप्रति श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरेको छ। साथै दोषीलाई तत्काल पक्राउ गरी कानुनी दायरामा ल्याउन तथा यस्ता घटना दोहोरिन नदिन प्रभावकारी सुरक्षा व्यवस्था मिलाउन नेपाल सरकारसमक्ष जोडदार माग गरेको छ।

फिल्ड तथा कार्यालयमा खटिने कर्मचारीहरूको जीवन सुरक्षाको सुनिश्चितता गर्न विशेष व्यवस्था गर्नुपर्ने आवश्यकता औंल्याउँदै महासंघले मृतकलाई ‘शहीद’ घोषणा गरी पीडित परिवारलाई उचित क्षतिपूर्ति उपलब्ध गराउन पनि आग्रह गरेको छ।

महासंघले कर्मचारीहरूको सुरक्षाका विषयमा बेवास्ता गरिए कडा आन्दोलनका कार्यक्रमसमेत घोषणा गर्न बाध्य हुने चेतावनी दिएको छ।

यस घटनाले राष्ट्रसेवक कर्मचारीहरूको मनोबलमा असर पार्नुका साथै सार्वजनिक सेवा प्रवाहमा समेत चुनौती थपिएको विश्लेषण गरिएको छ। महासंघले सुरक्षित कार्य वातावरण सुनिश्चित गर्न राज्यका सम्बन्धित निकायहरूलाई गम्भीर बन्न आग्रह गरेको छ।