हामी सबैकाे संसारन्यूज

काठमाडौँ । स्याङ्जा क्षेत्र नम्बर–१ का उम्मेद्वार शैलेन्द्र घिमिरेले स्याङ्जामा सबैभन्दा ठूलो हक्काँ गर्ने शक्ति नेकपा र तारा चिह्न रहेको दाबी गरेका छन् ।
नेपाल कम्युनिस्ट पार्टी स्याङ्जा–काठमाडौँ सम्पर्क समन्वय समितिको आयोजनामा मतदाता भेटघाट तथा परिचयात्मक कार्यक्रमलाई सम्बोधन गर्दै उनले यस्तो बताएका हुन् ।
घिमिरेले काठमाडौँको तुलनामा पोखरामा दोब्बर उत्साह देखिएको र पोखराभन्दा स्याङ्जाका मतदातामा ताराप्रतिको उत्साह अझै दोब्बर रहेको बताए ।

उनले वर्तमान निर्वाचन किन आवश्यक प¥यो भन्ने विषयमा सबैले गम्भीर रूपमा सोच्नुपर्ने बताए । जेनेरेशन–जेड (जेनजी) आन्दोलनले पुराना नेतृत्वलाई विश्राम दिन र नयाँ अनुहारलाई अवसर दिनुपर्ने सन्देश दिएको उनको भनाइ थियो । स्याङ्जाका मतदाताले उक्त सन्देश बुझेको दाबी गर्दै उनले विभिन्न दलमा आबद्ध व्यक्तिहरूले समेत आफ्नो पक्षमा समर्थन जनाइरहेको बताए ।

घिमिरेले काठमाडौँमा अपेक्षाकृत कम उत्साह देखिए पनि स्याङ्जा पुग्दा वातावरण फरक हुने जिकिर गरे । उनले अभियानमा सहभागी भई परिवर्तनका लागि साथ दिन आग्रह गरे ।
उनले रत्नकुमार वात्ववाको भनाई उधृत गर्दै भने, ‘आँधी, हुरी नचलेको बेला वातावरण शान्त भएको बेला एउटा कायरलेपनि बहादुरीका लामा लामा कुरा गर्न सक्छ । एउटा नर्कटपनि पहाड माथि ठिङ्ग उभिन सक्छ । तर आँधी र हुरी चलेको बेला एउटा सतिशाल मात्र पहाडमा ठिङ्ग उभिन सक्छ ।’

उम्मेद्वार घिमिरेले केही गर्न सक्ने ताजगत, उर्जा, तर्क र उत्साह नेकपासँग मात्र भएको दाबी गरे ।