हामी सबैकाे संसारन्यूज

काठमाडौँ । मुक्तक सागर र प्रोक्सिमा इन्टरनेशनल एकेडेमीको संयुक्त पहलमा विद्यार्थी लक्षित मुक्तक लेखन तथा वाचन प्रतियोगिता सम्पन्न भएको छ ।

शुक्रबार आयोजित उक्त कार्यक्रममा २८ जना विद्यार्थीले उत्साहका साथ आफ्ना सिर्जना प्रस्तुत गरेका थिए ।

प्रतियोगिताको मूल्यांकन मुक्तकसागरकी सम्पादक निशा के.सी., शिक्षिका उर्मिला सापकोटा र साहित्यकार वसुन्धरा चौहान ‘सुनिता’ले गरेकी थिइन् ।

कार्यक्रममा एकेडेमीका निर्देशक सरोज भट्टराई तथा प्रशासनिक प्रिन्सिपल नानीछोरी खाइतुले विद्यार्थीहरूको प्रस्तुतिले आफूहरू गौरवान्वित भएको बताउँदै विद्यालयमा यस्ता सिर्जनात्मक गतिविधि निरन्तर हुनुपर्नेमा जोड दिए ।

प्रिन्सिपल सुजन भट्टराईले साहित्यिक अभ्यासले विद्यार्थीमा रुचि, आत्मविश्वास र सिर्जनशीलता बढाउन मद्दत गर्ने उल्लेख गरे । गजलकार जुमन किरणले पनि कार्यक्रमले नयाँ पुस्तालाई लेखनतर्फ प्रेरित गरेको धारणा राखिन् ।

कार्यक्रमका अवसरमा साहित्यकार वसुन्धरा चौहान ‘सुनिता’ले आफ्ना केही मुक्तक वाचन गरी वातावरणलाई थप साहित्यिक बनाइन् ।

त्यस्तै, सम्पादक निशा के.सी.ले नतिजा घोषणा गर्दै साहित्यले विद्यार्थीको रचनात्मक क्षमता अभिवृद्धि गर्ने महत्वपूर्ण माध्यम भएको बताइन् ।

गजलकार जुमन किरण र साहित्यकार वसुन्धरा चौहान ‘सुनिता’को संयोजनमा सम्पन्न कार्यक्रम एकेडेमीका संस्थापक धर्मरत्न खाइतुको अध्यक्षतामा भएको थियो । सञ्चालन शिक्षक राजु वाइवाले गरेका थिए ।