Sansar News
काठमाडौँ । नेपालका वाणिज्य बैंकहरूले वैशाख महिनाका लागि नयाँ ब्याजदर सार्वजनिक गरेका छन्, जसअनुसार निक्षेपको ब्याजदरमा सामान्य गिरावट देखिएको छ । चैत महिनाको तुलनामा वैशाखमा व्यक्तिगत र संस्थागत दुवैतर्फको औसत ब्याजदर घटेको हो ।
चैतमा व्यक्तिगत निक्षेपतर्फ औसत ब्याजदर ४.४९ प्रतिशत रहेकोमा वैशाखमा घटेर ४.४० प्रतिशतमा झरेको छ । त्यस्तै संस्थागत निक्षेपतर्फ चैतमा ३.२९ प्रतिशत रहेको औसत ब्याजदर वैशाखमा घटेर ३.२३ प्रतिशतमा सीमित भएको छ ।
बैंकगत रूपमा हेर्दा केही बैंकहरूले ब्याजदर घटाएका छन् भने केहीले यथावत् राखेका छन्।
सिटिजन्स बैंक इन्टरनेशनल र एभरेस्ट बैंकले व्यक्तिगत निक्षेपदरमा क्रमशः ०.३५ र ०.२० प्रतिशतले ब्याजदर घटाएका छन ्।
त्यसैगरी हिमालयन बैंकले व्यक्तिगततर्फ ०.५० प्रतिशत र संस्थागततर्फ ०.२५ प्रतिशतले ब्याजदर घटाएको छ।
नबिल बैंकमा संस्थागत निक्षेपदर ०.५४ प्रतिशतले घटेको छ भने त्यस्तै एनआईसी एशिया बैंक र राष्ट्रिय वाणिज्य बैंकले पनि ०.२५ प्रतिशतले व्यक्तिगत निक्षेपको ब्याजदर घटाएका छन्।
त्यस्तै सिद्धार्थ बैंकमा दुवै प्रकारका निक्षेपदरमा ०.२५ प्रतिशतले गिरावट आएको छ ।
त्यस्तै माछापुच्छ्रे बैंक, एनएमिब बैंक, नेपाल इन्भेष्टमेण्ट मेगा बैंक, ग्लोबल आइएमई बैंक, नेपाल बैंक, नेपाल एसबिआई बैंक, प्रभु बैंक, लक्ष्मी सनराइज बैंक, प्राइम कमर्सियल बैंक र सानिमा बैंकले दुवैतर्फको ब्याजदर यथावत् राखेका छन्।
वि.सं.२०८२ चैत ३० सोमवार १५:२१ मा प्रकाशित
