हामी सबैकाे संसारन्यूज

काठमाडौं । नेपाली कम्युनिस्ट पार्टीका संयाेजक पुष्पकमल दाहाल प्रचण्डले वर्तमान संसद् समावेशी आन्दोलन र हजारौँ सहिदहरूको बलिदानको जगमा निर्माण भएको बताएका छन् ।

प्रतिनिधिसभाको बैठकलाई सम्बोधन गर्दै पूर्वप्रधानमन्त्रीसमेत रहेका प्रचण्डले बाहिरबाट संसद् भवन सिमेन्ट, इँटा र फलामले बनेको देखिए पनि यसको आधारमा सहिदहरूको त्याग र संघर्ष रहेको उल्लेख गरे ।

उनले भने, “हरेक वर्ग, वर्ण, जाति, लिङ्ग र समुदायको प्रतिनिधित्व भएको यो समावेशी संसद्का लागि हामीले हिजो बन्दुक उठायौँ, आन्दोलन गर्‍यौँ । यो भवनको जगमा हजारौँ सहिदको रगत र बलिदान मिसिएको छ ।”

सम्बोधनका क्रममा प्रचण्ड भावुक बनेका थिए । उनले सशस्त्र तथा शान्तिपूर्ण आन्दोलन, जनआन्दोलनदेखि पछिल्लो पुस्ताले सञ्चालन गरेका अभियानसम्म योगदान दिने सहिद, बेपत्ता, घाइते योद्धा तथा अभियानकर्मीप्रति सम्मान व्यक्त गरे ।

प्रचण्डले पछिल्लो निर्वाचनमा राष्ट्रिय स्वतन्त्र पार्टीले हासिल गरेको सफलताको पनि प्रशंसा गरे । उनले पार्टीले झन्डै दुई तिहाइ सफलता हासिल गरेको उल्लेख गर्दै सभापति रवि लामिछाने  र प्रधानमन्त्री बालेन शाहलाई विशेष बधाई दिए ।

उनले आफ्नो दल निर्वाचन परिणामका हिसाबले खुम्चिएको भए पनि वर्तमान राजनीतिक वातावरण निर्माणमा महत्त्वपूर्ण भूमिका खेलेको दाबी गरे । साथै, लोकतान्त्रिक गणतन्त्र, समावेशिता र संघीयताको रक्षा गर्न सबै राजनीतिक शक्तिहरूबीच सहकार्य आवश्यक रहेको धारणा व्यक्त गरे ।