हामी सबैकाे संसारन्यूज

काठमाडौँ । चालू आर्थिक वर्ष २०८१/८२ को तेस्रो त्रैमाससम्ममा नेपालमा सञ्चालित १४ वटा जीवन बीमा कम्पनीहरूको अभिकर्ता कमिसन विवरण सार्वजनिक गरेको छ ।

सार्वजनिक गरिएको विवरण अनुसार गत आर्थिक वर्षको सोही अवधिको तुलनामा जीवन बीमा कम्पनीहरूको कुल कमिसन खर्च १२.०४ प्रतिशतले बढेको हो ।

कम्पनीहरूले सार्वजनिक गरेको चैत मसान्तसम्मको वित्तीय विवरण अनुसार, यस अवधिमा १४ कम्पनीले कुल ११ अर्ब ४ करोड ५४ लाख ४२ हजार रुपैयाँ कमिसनमा खर्च गरेका छन् । गत वर्षको यही अवधिमा यस्तो खर्च ९ अर्ब ८५ करोड ८३ लाख ८ हजार रुपैयाँ मात्र थियो।

नेपाल लाइफ अग्रस्थानमा
सार्वजनिक गरेको तथ्याङ्क अनुसार कमिसन खर्च गर्ने मामिलामा नेपाल लाइफ इन्स्योरेन्स सबैभन्दा अगाडि देखिएको छ । यस कम्पनीले चैत मसान्तसम्म २ अर्ब ७३ करोड ६६ लाख रुपैयाँ अभिकर्तालाई कमिसन बापत वितरण गरेको छ, जुन गत वर्षको तुलनामा १३.४८ प्रतिशत बढी हो ।

त्यसपछि नेशनल लाइफ इन्स्योरेन्सले १ अर्ब ६२ करोड २५ लाख रुपैयाँ, एलआईसी नेपालले १ अर्ब ७ करोड २४ लाख रुपैयाँ, हिमालयन लाइफले १ अर्ब ४ करोड ३० लाख रुपैयाँ अभिकर्तालाई कमिसन दिएका छन्। यस्तै सूर्यज्योति लाइफले ७४ करोड रुपैयाँ, एशियन लाइफले ५९ करोड ७० लाख रुपैयाँ, सिटिजन लाइफले ५६ करोड २६ लाख रुपैयाँ र सानिमा रिलायन्स लाइफले ५४ करोड १० लाख रुपैयाँ कमिसनबापत खर्च गरेका छन्।

त्यसैगरी आइएमई लाइफले ४३ करोड ६४ लाख रुपैयाँ, रिलायबल नेपाल लाइफले ४२ करोड २३ लाख रुपैयाँ, मेट लाइफले ४१ करोड ४८ लाख रुपैयाँ, प्रभु महालक्ष्मी लाइफले ३९ करोड ६३ लाख रुपैयाँ तथा सन नेपाल लाइफले ३१ करोड ६७ लाख रुपैयाँ अभिकर्तालाई कमिसन दिएका छन् । राष्ट्रिय जीवन बीमा कम्पनीको यस्तो खर्च १४ करोड ३३ लाख रुपैयाँ मात्रै रहेको छ ।

चालू आर्थिक वर्षको तेस्रो त्रैमाससम्म आईएमई लाइफले अभिकर्ता कमिसनमा सबैभन्दा उच्च २९.९० प्रतिशतको वृद्धि हासिल गरेको छ। खर्च बढ्ने अन्य कम्पनीहरूको सूचीमा रिलायबल नेपाल (१७.६१ प्रतिशत), सिटिजन लाइफ (१७.४८ प्रतिशत) र सानिमा रिलायन्स (१५.४१ प्रतिशत) अगाडि देखिएका छन्। सबैभन्दा सुस्त वृद्धि भने राष्ट्रिय जीवन बीमा कम्पनीको देखिएको छ, जसको कमिसन खर्च मात्र २.०८ प्रतिशतले बढेको छ ।