हामी सबैकाे संसारन्यूज

काठमाडौं । जेन्जी अभियन्ता रक्षा बमले सरकारले नागरिकका आधारभूत आवश्यकतामाथि करको भार थपेको भन्दै सरकारलाई तत्काल निर्णय सच्याउन चेतावनी दिएकी छन्।

सरकारको कामकारबाहीमाथि निरन्तर निगरानी गर्दै आएकी बमले पछिल्लो समय शव व्यवस्थापन तथा आधारभूत सेवासँग सम्बन्धित करका विषयमा जनआक्रोश बढिरहेका बेला सामाजिक सञ्जालमार्फत कडा प्रतिक्रिया व्यक्त गरेकी हुन्।

उनले सरकारमाथि कटाक्ष गर्दै लेखेकी छन्, “शिक्षामा कर। स्वास्थ्यमा कर। सास फेर्दा कर। मरेपछि आर्यघाट पुग्दासम्म कर। हाम्रो कहरमाथि नै कर ! आखिर नागरिकले बाँच्नका लागि चाहिने हरेक आधारभूत आवश्यकतामै कर तिर्नुपर्ने हो, सरकार ?

बमले नागरिकको बाध्यतामाथि थपिएको कर तत्काल फिर्ता लिन सरकारसँग माग गर्दै भनेकी छन्, “यसलाई तपाईंहरूले आग्रह ठान्नुस् वा चेतावनी। नागरिकका बाध्यतामाथि थोपारिएको कर तत्काल खारेज गरियोस्।”

उनले सरकारलाई समयमै आफ्नो निर्णय पुनर्विचार गर्न आग्रह गर्दै थप चेतावनी दिएकी छन्, “सच्चिनुहोस्। सच्याउनुहोस्। नत्र जनताले बारम्बार आफैँ सच्याएका उदाहरणहरू पनि छन्।”