हामी सबैकाे संसारन्यूज

काठमाडौं, । बागमती प्रदेश सरकारमा सहभागी नेकपा (एमाले) का सबै मन्त्रीले सामूहिक रूपमा राजीनामा दिएसँगै एमाले औपचारिक रूपमा सरकारबाट बाहिरिएको छ। एमाले बागमती प्रदेश संसदीय दलका नेता जगन्नाथ थपलियाले पार्टीका तर्फबाट सरकारमा रहेका मन्त्रीहरूको राजीनामा मुख्यमन्त्री तथा मन्त्रिपरिषद्को कार्यालयमा पठाएका हुन्।

राजीनामा दिने मन्त्रीहरूमा आर्थिक मामिलामन्त्री बिन्दु श्रेष्ठ, स्वास्थ्यमन्त्री डा. दिनेशचन्द्र देवकोटा, खानेपानी, ऊर्जा तथा सिँचाइमन्त्री किरण थापा, वन तथा वातावरणमन्त्री भरतबहादुर केसी, सहकारी तथा गरिबी निवारणमन्त्री मधुसूदन पौडेल तथा युवा तथा खेलकुदमन्त्री जयराम थापा रहेका छन्।

एमालेका मन्त्रीहरूको सामूहिक राजीनामासँगै बागमती प्रदेशको सत्ता समीकरण औपचारिक रूपमा परिवर्तन भएको छ। अब मुख्यमन्त्रीले बाँकी गठबन्धनको समर्थनका आधारमा सरकारलाई निरन्तरता दिने वा मन्त्रिपरिषद् पुनर्गठनमार्फत नयाँ राजनीतिक समीकरण बनाउने विकल्पमा अघि बढ्नुपर्ने अवस्था सिर्जना भएको छ।

एमाले मन्त्रीहरूको सामूहिक राजीनामापछि बागमती प्रदेशमा नयाँ मन्त्रिपरिषद् गठन, मन्त्रालय बाँडफाँट र नयाँ गठबन्धन निर्माणबारे राजनीतिक गतिविधि तीव्र हुने अपेक्षा गरिएको छ।