हामी सबैकाे संसारन्यूज

काठमाडौं । नेपाल माइक्रो इन्स्योरेन्सका पूर्व प्रमुख कार्यकारी अधिकृत (सीईओ) मृगेन्द्रनाथ रिमाल पक्राउ परेका छन्।

नेपाल प्रहरीको केन्द्रीय अनुसन्धान ब्युरो (सीआईबी) ले बिहीबार काठमाडौं महानगरपालिका–७, सिफलबाट रिमाललाई पक्राउ गरेको हो। उनी व्यवसायी दिपक भट्ट विरुद्ध बिमा ऐन, २०७९ र धितोपत्र ऐन, २०६३ अन्तर्गत दर्ता भएको मुद्दासँग सम्बन्धित अनुसन्धानका क्रममा पक्राउ परेका हुन्।

सीआईबीका अनुसार रिमाल र दिपक भट्टबीचको सम्बन्ध तथा उक्त मुद्दासँग जोडिएका विषयमा अनुसन्धानका क्रममा उनलाई नियन्त्रणमा लिइएको हो।

पक्राउ परेका रिमाललाई बिहीबार नै जिल्ला अदालत काठमाडौंमा उपस्थित गराइएको छ। अनुसन्धानका लागि हिरासतमा राख्न म्याद थपको प्रक्रिया अघि बढाइएको प्रहरीले जनाएको छ।

प्रहरीले यस प्रकरणमा थप अनुसन्धान जारी रहेको तथा आवश्यक प्रमाण र तथ्य संकलन भइरहेको जनाएको छ। प्रहरीले रिमालविरुद्ध लागेको आरोप अदालतबाट प्रमाणित भइसकेको नभई उनी अनुसन्धानको प्रक्रियामा रहेको स्पष्ट गरेको छ।