हामी सबैकाे संसारन्यूज

काठमाडौं । सुनसरीको देवानगञ्ज गाउँपालिका–३ मा आइतबार भएको घटनाका क्रममा प्रहरीको गोली लागेर घाइते भएका अर्का एक युवकको उपचारका क्रममा मृत्यु भएको छ।प्रहरीका अनुसार देवानगञ्ज–३ का २२ वर्षीय जयप्रकाश मेहताको बिहीबार दिउँसो विराटनगरस्थित न्यूरो अस्पतालमा उपचारका क्रममा मृत्यु भएको हो।

आइतबार राति देवानगञ्जमा भएको झडपका क्रममा प्रहरीको गोली लागेर उनी गम्भीर घाइते भएका थिए। उपचारका लागि अस्पताल भर्ना गरिए पनि चिकित्सकको प्रयास सफल हुन नसकेको प्रहरीले जनाएको छ।

यसअघि सोही घटनामा ओमप्रकाश मेहताको मृत्यु भएकाे थियो। जयप्रकाश मेहताको मृत्यु भएसँगै देवानगञ्ज घटनामा ज्यान गुमाउनेको संख्या दुई पुगेको छ। घटनामा गोली लागेर घाइते भएका अन्य ८ जनाको विराटनगरस्थित न्यूरो अस्पताल, विराट नर्सिङ होम र नोबेल शिक्षण अस्पतालमा उपचार भइरहेको छ।

प्रहरीका अनुसार उक्त घटनामा सुरक्षाकर्मीसहित २२ जनाभन्दा बढी व्यक्ति घाइते भएका थिए। घाइतेमध्ये केहीको विभिन्न अस्पतालमा उपचार भइरहेको छ।