हामी सबैकाे संसारन्यूज

काठमाडौं । राष्ट्रिय स्वतन्त्र पार्टी (रास्वपा) ले आगामी स्थानीय तह निर्वाचनलाई लक्षित गर्दै उम्मेदवार छनोट प्रक्रिया औपचारिक रूपमा अघि बढाउने भएको छ। पार्टीले आगामी भदौ १ गतेदेखि ‘क्यान्डिडेट क्लब’ का लागि आवेदन खुला गर्ने निर्णय गरेको जनाएको छ।

रास्वपाका महामन्त्री विपीनकुमार आचार्यले सामाजिक सञ्जालमार्फत जानकारी सार्वजनिक गर्दै स्थानीय तहसम्म राजनीतिक शुद्धीकरण र सुशासनको आधार निर्माण गर्ने उद्देश्यले ‘क्यान्डिडेट क्लब’ सञ्चालन गर्न लागिएको बताएका छन्।

उनका अनुसार आगामी स्थानीय तह निर्वाचनलाई पार्टीले केवल चुनावी प्रतिस्पर्धाका रूपमा नभई इमानदार, सक्षम र जनउत्तरदायी नेतृत्व स्थापित गर्ने अभियानका रूपमा लिएको छ। सोही उद्देश्यलाई कार्यान्वयन गर्न उम्मेदवार छनोटको पहिलो चरणस्वरूप ‘क्यान्डिडेट क्लब’मा आवेदन आह्वान गर्न लागिएको उनले उल्लेख गरेका छन्।

महामन्त्री आचार्यले परम्परागत राजनीतिक दलहरूले अपनाउँदै आएको अपारदर्शी उम्मेदवार छनोट प्रणालीलाई परिवर्तन गर्दै रास्वपाले थप लोकतान्त्रिक, पारदर्शी, वैज्ञानिक र आधुनिक प्रणालीमार्फत उम्मेदवार छनोट गर्ने तयारी गरिरहेको बताएका छन्।

उनले उम्मेदवार छनोटको प्रारम्भिक रूपरेखा तयार भइसकेको जनाउँदै त्यसलाई अझ प्रभावकारी, व्यावहारिक र जनमुखी बनाउन पार्टीभित्र व्यापक छलफल भइरहेको जानकारी दिएका छन्।

हाल पार्टीका विभिन्न संरचना, नेता–कार्यकर्ता तथा आम सदस्यबाट सुझाव सङ्कलन भइरहेको र प्राप्त सुझावका आधारमा उम्मेदवार छनोटको मापदण्ड, मूल्याङ्कन प्रणाली तथा कार्यविधिलाई अन्तिम रूप दिइने उनले बताएका छन्।

आचार्यका अनुसार यस प्रक्रियाले उम्मेदवार छनोटलाई निष्पक्ष, विश्वसनीय र प्रतिस्पर्धात्मक बनाउने अपेक्षा गरिएको छ। साथै, स्थानीय तहमा योग्य र जनउत्तरदायी नेतृत्व स्थापित गर्ने पार्टीको दीर्घकालीन अभियानलाई समेत यसले संस्थागत आधार प्रदान गर्ने विश्वास व्यक्त गरिएको छ।