हामी सबैकाे संसारन्यूज

सिरहा । सिरहामा दुई पक्षबीच भएको झडपका क्रममा सुरक्षाकर्मीको गोली लागेर एक जनाको मृत्यु भएको छ।

जिल्ला प्रशासन कार्यालयका सहायक प्रमुख जिल्ला अधिकारी चेतराज बरालका अनुसार औरही गाउँपालिका–२ का अन्दाजी १५ वर्षीय गणेश यादवको उपचारका क्रममा मृत्यु भएको हो।

जिल्ला प्रशासनका अनुसार बिहीबार बिहानदेखि दुई पक्षबीच तनाव र झडप भइरहेको थियो। स्थिति नियन्त्रणमा लिन सुरक्षाकर्मी परिचालन गरिएको थियो। सोही क्रममा सुरक्षाकर्मीको गोली लाग्दा यादव गम्भीर घाइते भएका थिए। उनको उपचारका क्रममा मृत्यु भएको हो। घटनाको विस्तृत विवरण र गोली चलाउनुपर्ने अवस्थाबारे थप अनुसन्धान भइरहेको प्रशासनले जनाएको छ।

घटनापछि जिल्लाको सुरक्षा अवस्था तनावग्रस्त बनेपछि प्रशासनले दिउँसो २ बजेदेखि कर्फ्यु आदेश जारी गरेको छ। प्रशासनले सर्वसाधारणलाई कर्फ्यु आदेशको पालना गर्न आग्रह गर्दै शान्ति–सुरक्षा कायम राख्न सबै पक्षसँग संयमता अपनाउन अनुरोध गरेको छ। सुरक्षा चुनौती बढ्दै गएपछि सिरहाका साथै, धनुषा, लाहानमा पनि अन्श्चिितकालीन कर्फ्यु  लगाइएको छ ।

आइतबार साँझ सुनसरीको देवानगञ्ज गाउँपालिका–३, कप्तानगञ्जबाट सुरु भएको झडपको अवस्था मधेस प्रदेशका विभिन्न जिल्लाहरुमा फैलिँदै गएको छ । जिल्ला प्रशासन कार्यालयहरुले कर्फ्यु  आदेश गरेपनि नागरिकहरुले प्रतिवाद गर्दै सडकमा आउँदा भिडिन्तका घटनाहरु पनि बढीरहेका छन् । यसैक्रममा आज सिराहामा गणेश यादवको ज्यान गएको छ ।