हामी सबैकाे संसारन्यूज

काठमाडौँ । पूर्वमन्त्री तथा नेकपा (एमाले) का नेता गोकुल बास्कोटाले गत भदौ २४ मा भएको हिंसात्मक घटनाको निष्पक्ष छानबिन र त्यसका प्रायोजकमाथि कारबाही नभएसम्म देशमा हिंसा र अराजकता अन्त्य हुन नसक्ने बताएका छन्।

हालै सुनसरी, सिरहा लगायतका स्थानमा भएका हिंसात्मक घटनाको सन्दर्भ उल्लेख गर्दै बास्कोटाले भदौ २४ को घटनाका दृश्य तथा अदृश्य योजनाकार र प्रायोजकको पहिचान गरी कानुनी दायरामा ल्याउन सरकारसँग माग गरेका छन्। उनका अनुसार हिंसात्मक गतिविधिका जरा नै उखेल्न नसके देशले स्थायित्व र शान्ति प्राप्त गर्न सक्दैन।

सामाजिक सञ्जालमार्फत प्रतिक्रिया दिँदै उनले हिंसात्मक घटनामा संलग्न व्यक्ति तथा योजनाकारलाई कानुनी कारबाहीको दायरामा नल्याएसम्म दण्डहीनताको संस्कृतिले प्रश्रय पाइरहने र देश अस्थिरताको चक्रबाट मुक्त हुन नसक्ने धारणा व्यक्त गरेका छन्।

बास्कोटाले दण्डहीनताको संरक्षण कुनै पनि हालतमा स्वीकार्य नहुने उल्लेख गर्दै सरकारले स्पष्ट धारणा सार्वजनिक गरी प्रभावकारी कदम चाल्नुपर्ने बताएका छन्। सरकारलाई सम्बोधन गर्दै उनले ‘बोल सरकार, एक फेर बोल !’ भन्दै भदौ २४ को घटनाबारे सरकारको आधिकारिक धारणा र ठोस कारबाहीको अपेक्षा व्यक्त गरेका छन्।