हामी सबैकाे संसारन्यूज

बेनी । विश्वप्रसिद्ध नेपाली पर्वतारोही निर्मल ‘निम्सदाई’ पुर्जाको पाकिस्तानस्थित ८,०५१ मिटर अग्लो ब्रोड पिक हिमाल आरोहणका क्रममा हिमपहिरोमा परी निधन भएपछि उनको जन्मस्थल म्याग्दीको अन्नपूर्ण गाउँपालिकाले सोमबार शोक बिदा दिने निर्णय गरेको छ।

गाउँपालिकाले आइतबार सूचना जारी गर्दै निम्सदाईको असामयिक निधनप्रति गहिरो दुःख व्यक्त गर्दै सोमबार अत्यावश्यक सेवाबाहेकका सम्पूर्ण सरकारी कार्यालय, वडा कार्यालय, स्वास्थ्य संस्था तथा सामुदायिक विद्यालयमा शोक बिदा दिने जनाएको हो।

गाउँपालिकाका अनुसार शोक बिदामार्फत विश्व पर्वतारोहण क्षेत्रमा नेपाललाई विशिष्ट पहिचान दिलाएका पुर्जाप्रति सम्मान प्रकट गर्न तथा उनको योगदानको कदर गर्न यो निर्णय गरिएको हो।

म्याग्दीको अन्नपूर्ण गाउँपालिकामा जन्मिएका निर्मल पुर्जा विश्व पर्वतारोहण क्षेत्रमा साहस, कीर्तिमान र नेतृत्वका लागि परिचित थिए। उनले विश्वका ८ हजार मिटरभन्दा अग्ला १४ वटै हिमाल सबैभन्दा कम समयमा आरोहण गरेर विश्व कीर्तिमान कायम गरेका थिए। पछिल्लो समय उनले ८ हजार मिटरभन्दा अग्ला हिमालहरूको सफल आरोहण संख्या ५४ पुर्‍याएका थिए, जसमध्ये २५ वटा आरोहण पूरक अक्सिजन (बिना अक्सिजन) बिना गरेका थिए।

निर्मल पुर्जा नेतृत्वको १० सदस्यीय आरोही टोली पाकिस्तानको ब्रोड पिक आरोहणका क्रममा करिब छ हजार ७०० मिटरको उचाइमा पुगेपछि हिमपहिरोमा परेको थियो । टोलीमा छ नेपाली र चार विदेशी आरोही सहभागी थिए ।