हामी सबैकाे संसारन्यूज

काठमाडौँ। सिन्धुलीको फिक्कल गाउँपालिका–२ नवलपुरस्थित मध्यपहाडी लोकमार्गमा बस र सडक विभागको कार एकापसमा ठोक्किँदा कार सुनकोशी नदीमा खस्दा तीन जना बेपत्ता भएका छन्।

प्रहरीका अनुसार आज बिहान करिब ११ः४५ बजे काठमाडौंबाट ओखलढुंगातर्फ जाँदै गरेको बा.प्र.०८–००१ ख ०१४४ नम्बरको बस र विपरीत दिशाबाट खोटाङतर्फबाट खुर्कोट आउँदै गरेको सडक विभाग यान्त्रिक कार्यालय मुलकोट, मध्यपहाडी लोकमार्गको कार एकापसमा ठोक्किएका थिए।

दुर्घटनापछि कार सडकबाट करिब ५० फिट तल सुनकोशी नदीमा खसेको प्रहरीले जनाएको छ।

दुर्घटनामा कार चालक सिन्धुपाल्चोक निवासी करिब ३९ वर्षीय दिलकुमार लामा, स्काइभेटर चालक सिन्धुली गोलञ्जोर गाउँपालिका–१ निवासी गणेश थापा (करिब २७ -२८ वर्ष) तथा नाम, थर र वतन नखुलेका एक जना हेल्पर नदीमा बेपत्ता भएका छन्।

घटनालगत्तै प्रहरी टोली परिचालन गरी बेपत्ताहरूको खोजी तथा उद्धार कार्य जारी राखिएको छ।

उक्त बस सिन्धुली फिक्कल गाउँपालिका–६ निवासी २६ वर्षीय हेमबहादुर तामाङ ले चलाएका थिए। प्रहरीले बस र चालकलाई नियन्त्रणमा लिई आवश्यक अनुसन्धानका लागि प्रहरी चौकी खाङसाङमा राखेको जनाएको छ।

प्रहरीले बेपत्ता कार र व्यक्तिहरूको खोजी तथा उद्धार कार्य जारी रहेको र घटनाबारे थप अनुसन्धान भइरहेको जनाएको छ।