हामी सबैकाे संसारन्यूज

काठमाडौँ । नेपाली फुटबलमा विगत १२ वर्षदेखि सक्रिय रहेका आइभरी कोस्टका फुटबल खेलाडी फ्लोरेन्ट कोआराले स्वदेश फर्किन सहयोग गरिदिन अपिल गरेका छन्।

सामाजिक सञ्जालमार्फत अपिल गर्दै कोआराले आफू अहिले गम्भीर आर्थिक संकटमा परेको र नेपालमा फुटबल गतिविधि सुस्ताउँदा आफ्नो खेलजीवनसमेत प्रभावित भएको बताएका छन्।

नेपालका विभिन्न क्लबबाट व्यावसायिक फुटबल खेल्दै आएका उनी पछिल्लो समय फुटबल गतिविधि ठप्पजस्तै भएपछि थप आर्थिक समस्यामा परेका हुन्। फिफाको प्रतिबन्ध तथा घरेलु फुटबल गतिविधिमा आएको सुस्तताका कारण आफू नेपालमा बस्न कठिन अवस्थामा पुगेको उनको भनाइ छ।

कोआराले आफू नेपालमा अवैध रूपमा बस्न नचाहेको भन्दै आफ्नो मातृभूमि आइभरी कोस्ट फर्किन चाहेको बताएका छन्। तर, स्वदेश फर्किन आवश्यक आर्थिक स्रोतसमेत आफूसँग नभएकाले उनले नेपाली समुदायसँग सहयोगको आग्रह गरेका छन्।

“म अवैध रूपमा बस्न चाहन्नँ। फिफा प्रतिबन्धका कारण नेपालमा फुटबल गतिविधि रोकिँदा म अप्ठ्यारोमा परेँ। यस्तो अवस्थामा म आफ्नो देश आइभरी कोस्ट फर्किन चाहन्छु।”

 एक दशकभन्दा बढी समय नेपाली फुटबलमा योगदान दिएका उनले अन्तिमपटक सहयोगको याचना गर्दै नेपाली समुदायसँग गुहार मागेका छन् । सहयोग गर्न चाहनेहरूले ९८०३१२५५५१ नम्बरमा सम्पर्क गर्न सक्नेछन् ।