हामी सबैकाे संसारन्यूज

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आगामी भदौ ५ गते पार्टीको केन्द्रीय समिति बैठक बोलाएका छन् । पार्टी केन्द्रीय कार्यालय बनस्थलीमा बस्ने बैठकमा लामो समयदेखि रिक्त रहेका पदाधिकारी तथा केन्द्रीय सदस्य मनोनयनको प्रस्ताव अघि बढाउने तयारी गरिएको छ ।

रास्वपामा एक उपसभापति, एक महामन्त्री, एक सहमहामन्त्री, एक प्रवक्ता, तीन सहप्रवक्ता, एक कोषाध्यक्ष र दुई सहकोषाध्यक्ष मनोनयन गर्न बाँकी छ । त्यसैगरी २७ जना सचिवालय सदस्य र ५१ जना केन्द्रीय सदस्य समेत मनोनयन गर्ने तयारी रहेको पार्टीले जनाएको छ । बैठकमा सहभागी हुन केन्द्रीय सदस्यहरूलाई जानकारी गराइसकिएको छ ।

पार्टीको सांगठनिक संरचनालाई पूर्णता दिने उद्देश्यले हुन लागेको यो बैठक रास्वपाका लागि महत्वपूर्ण मानिएको छ । नयाँ पदाधिकारी तथा केन्द्रीय सदस्य मनोनयन भएपछि पार्टीको केन्द्रीय संरचना थप व्यवस्थित हुने र आगामी राजनीतिक गतिविधि तथा संगठन विस्तारलाई गति दिने अपेक्षा गरिएको छ ।

यसअघि साउन १३ गते बसेको रास्वपा केन्द्रीय समिति बैठकले बालेन शाहलाई वरिष्ठ नेता बनाउने प्रस्ताव पारित गरेको थियो । उक्त निर्णयपछि पार्टीको नेतृत्व संरचना र आगामी राजनीतिक रणनीतिबारे थप चर्चा भएको थियो । आगामी बैठकमा पनि संगठन विस्तारसँगै पार्टीको राजनीतिक तथा समसामयिक विषयमा छलफल हुने सम्भावना छ । बैठकमा आगामी स्थानीय निर्वाचनका सन्दर्भमा समेत छलफल हुने अपेक्षा गरिएको छ ।

रास्वपाले पछिल्लो समय संगठन विस्तार, जिम्मेवारी बाँडफाँट र पार्टी संरचनालाई संस्थागत गर्ने प्रक्रियालाई अघि बढाइरहेको छ ।