हामी सबैकाे संसारन्यूज

काठमाडौँ । रसुवाको भोटेकोशी नदीमा आएको विनाशकारी बाढीबाट प्रभावित भएकाहरूलाई सघाउन शाइन रेसुङ्गा डेभलपमेन्ट बैंकले ६५ लाख रुपैयाँ आर्थिक सहयोग गरेको छ। बाढीपीडितको खोजी, उद्धार, राहत र पुनःस्थापनाका लागि बैंकले उक्त रकम प्रधानमन्त्री दैवीप्रकोप उद्धार कोषमा हस्तान्तरण गरेको हो ।

६५ लाख सहयोग रकममध्ये बैंकका तर्फबाट ५५ लाख र बैंकमा कार्यरत कर्मचारीहरूबाट १० लाख रुपैयाँ सङ्कलन गरिएको छ ।

हालैको प्राकृतिक विपत्तिका कारण रसुवा, नुवाकोट, धादिङ, गोरखा, तनहुँ र चितवन लगायतका जिल्लाहरूमा ठूलो मानवीय तथा भौतिक क्षति पुगेको छ। सर्वसाधारणको दैनिकी प्रभावित बनिरहेको यस कठिन परिस्थितिमा सरकारी तथा गैरसरकारी उद्धार कार्यलाई सघाउन रकम सहयोग गरिएको बैंकले जनाएको छ ।

विपत्तिको यो घडीमा प्रभावित नागरिकहरूको साथमा रहँदै सरकार र उद्धारमा खटिएका निकायहरूसँग हातेमालो गर्न बैंक प्रतिबद्ध रहेको छ ।

साथै, बैंकले बाढीमा परी ज्यान गुमाएकाहरूप्रति श्रद्धाञ्जली व्यक्त गर्दै शोकमा परेका परिवारजनमा समवेदना प्रकट गरेको छ । बाढीमा हराइरहेकाहरूको सकुशल उद्धार र घाइतेहरूको शीघ्र स्वास्थ्य लाभको कामना पनि बैंकले गरेको छ ।