गाइजात्राकै वरीपरी पारेर जात्रा प्रहशन भयो पाठकबृन्द यसपाला । सबै पंचहरुमा मुख्य अभिभावक भनिएका पूर्वराजा ज्ञानेन्द्रले देशप्रति माया भएकाहरु एकैठाउँमा हुनुपर्ने भनेर अपिल गरेकै बेला पंचहरुले भने सो अपिलको समेत अवज्ञा गरे पाठकबृन्द ।
सुर्य बहादुर थापा (सुबथा) को निधन अघि श्री लोचन (लोकेन्द्र बहादुर चन्द) र सुबथाको द्धन्द्ध मुख्य हुन्थ्यो पाठकबृन्द । तर, यतिबेला थापाकाजीले काठमाडौं र धनकुटा मात्र होइन ब्रम्हाण्ड नै छाडेर गैसकेका छन् । अनि छोरो सुवथालाई ढाप दिइरहेका छन् । कथाका पात्र कमल थापा शक्तिसाली पार्टी अध्यक्ष भैरहेका बेला स्थानीयतहको निर्वाचनमा साह्रै लाजमर्दो परीणाम आउनु अनि वरिष्ठ नेताहरुको मनोभावना बुझ्न नखोज्नुले राप्रपालाई संकटमा पु¥याउने अनुमान सबैका हनुमानले समेत गरेकै थिए पाठकबृन्द ।
प्रचलो (प्रकाशचन्द्र लोहनी) र केववि (केशर बहादुर विष्ट) को समुह मिलेर नयाँ पार्टी बनिसकेपछि पनि श्री पशरा (पशुपति सम्शेर राणा) ले कनिकुथी नयाँ पार्टी बनाएको घोषणा गरेपछि राप्रपाले गाइजात्रा देखाएको हो पाठकबृन्द । यता टाल्दा उता नहुने, उता टाल्दा यता नहुने राजपा जस्तै राप्रपा त हुन्न ? कम्तिमा राष्ट्रवादीहरुलाई चिन्ता परेको छ पाठकबृन्द ।
