Sansar News
११ माघ, नेपालगन्ज (रासस) । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले बाँके जिल्लाको ऐतिहासिक भूमिकालाई कुनै पनि हालतमा ओझेलमा पर्न नदिइने बताए ।
यहाँ आजदेखि शुरु भएको प्रादेशिक महोत्सवको उद्घाटन गर्दै उनले प्रदेशको राजधानी जहाँ भए पनि प्रदेशअन्तर्गतका सबै जिल्लाको विकासको गति रोकिन नदिनेतर्पm सोच्नुपर्ने बताए।
पूर्वप्रधानमन्त्री दाहालले नेपालगन्जबाट मानसरोवर जाने तीर्थयात्री एवं पर्यटकको सङ्ख्या ह्वात्तै बढेकाले नेपालगन्ज विमानस्थललाई अन्तर्राष्ट्रियस्तरको क्षेत्रीय विमानस्थल बनाउन आफूले सक्दो पहल गर्ने विश्वास दिलाए ।
महोत्सव उद्घाटन समारोहमा नेपालगन्ज उद्योग वाणिज्य संघका अध्यक्ष नन्दलाल वैश्य, नेपाल उद्योग वाणिज्य महासंघका अध्यक्ष भवानी राणा, प्रतिनिधिसभामा नवनिर्वाचित सदस्यद्वय नन्दलाल रोकाय र इस्तियाक राई लगायतले पनि मन्तव्य व्यक्त गरेका थिए ।
त्यस अवसरमा अध्यक्ष दाहाललाई प्रदेश नं ५को राजधानी बाँके हुनुपर्ने मागसहितको ज्ञापनपत्र बुझाइएको थियो । नेपालगन्ज उद्योग वाणिज्य संघको आयोजनामा यही माघ २२ गतेसम्म चल्ने महोत्सवमा स्वदेशी र विदेशी कम्पनीका ३१६ कक्ष राखिएका छन् । महोत्सवमा राष्ट्रिय तथा स्थानीय कलाकारको सांगीतिक प्रस्तुति पनि रहनेछ । महोत्सव उद्घाटनअघि झाँकीसमेत प्रदर्शन गरिएको थियो ।
वि.सं.२०७४ माघ ११ बिहीवार १५:५२ मा प्रकाशित
