हामी सबैकाे संसारन्यूज

४ फागुन, पोखरा  । प्रदेश नं ४ सभाका सभामुख नेत्रनाथ अधिकारीले सबैले मिलेर यस प्रदेशलाई नमूना प्रदेशका रुपमा विकास गर्नुपर्नेमा जोड दिँदै तीव्र गतिमा काम गर्न प्रदेशसभा सचिवालयका कर्मचारीलाई निर्देशन दिएका छन् ।

प्रदेश प्रमुख बाबुराम कुँवरबाट सभामुखको पद तथा गोपनीयताको शपथ लिएपछि पदबहाली गर्दै अधिकारीले सचिवालयका कर्मचारीलाई त्यस्तो निर्देशन दिएका हुन् ।

संघीयता कार्यान्वयन शुरु भएको छ यसलाई सफल बनाउन छिटोभन्दा छिटो काम गर्नुपर्ने आवश्यकता औँल्याउँदै उनले भने, “हामी हाम्रो स्थानबाट जुट्छौँ तपाईहरु तपाईको स्थानबाट जुट्नुहोस् । अब देश बनाउने जिम्मा हाम्रो काँधमा आएको छ ।’’

संघीयतालाई हेर्ने अझै धेरै भ्रम रहेको बताउँदै अधिकारीले ती भ्रम निवारण गर्न आवश्यक कानून छिटो छरितोरुपमा तर्जुमा हुनुपर्ने खाँचो औंल्याएका थिए ।

सभामुखको शपथ लिएर शहीदस्मृति पार्कमा शहीहदप्रति माल्यार्पण गरेपछि उहाँ सिधै नदीपुरस्थित प्रदेश भवन पुगेका थिए । सभामुखको कार्यकक्षमा पदभार ग्रहण गर्दै उनले प्रदेशसभा सञ्चालन गर्ने नियमावली बनाउने निर्णयमा हस्ताक्षर गरे ।

प्रदेश भवनमा पुग्दा सभामुख अधिकारीलाई प्रदेश सचिवालयका सचिव जीवराज बुढाथोकीलगायतले स्वागत गरेका थिए । (रासस)
–––