२० असोज, काठमाडौँ । मिर्गौला रोगी प्रेमबहादुर खड्कालाई रु पाँच लाख सहयोग गरिएको छ ।
बुधबार ललितपुरमा आयोजित सहयोग कार्यक्रममा सांसदव्दय उदयशमशेर राणा, चन्द्र महर्जन र समाजसेवी तथा नेपाली काँग्रेस महासमिति सदस्य जीतेन्द्रबहादुर श्रेष्ठले संयुक्त रुपमा रकम हस्तान्तरण गर्नुभएको हो ।
मिर्गाैला रोगी खड्काको सहयोगार्थ समाजसेवी श्रेष्ठको संयोजकत्वमा चलचित्र वडा नं ६ को विशेष प्रदर्शन गरी रकम सङ्कलन गरिएको हो । मङ्गलबार ललितपुरको ग्वार्कोस्थित गुण सिनेमा हलमा उक्त चलचित्र प्रदर्शनी गरिएको र त्यसबाट उठेको रकम र अन्य सहयोग रकम गरी रु पाँच लाख सङ्कलन भएको श्रेष्ठले जानकारी दिनुभयो ।
सहयोग रकम पाएपछि खड्काले सहयोगका लागि सबैलाई धन्यवाद दिनुभयो । समाजसेवी श्रेष्ठले एकआपसमा सहयोगी भावना नै नेपालीपनको सौन्दर्य भएको बताउनुभयो ।
