Sansar News
२८ असोज । देशका विभिन्न ठाउँमा भएका सवारी दुर्घटनामा परी बिहिबार मात्र ५ जनाको मृत्यु भएको छ । मोरङको बयरवन–९ स्थित पूर्वपश्चिम राजमार्गमा हिजो अपराह्न को १ ख २९१२ नं को बसको ठक्करबाट एक बालकको घटनास्थलमै मृत्यु भएको छ । मृत्यु हुनेमा बयरवन–८ का बमबहादुर लिम्बूका १० वर्षीय छोरा सन्दीप रहेको इलाका प्रहरी कार्यालय पथरीका प्रहरी निरीक्षक रमेश बस्नेतले जानकारी दिनुभयो ।
धनगढी । पूर्वपश्चिम राजमार्ग अन्तर्गत पर्ने कैलालीको बलिया सडकखण्डमा गए राति दुई मोटरसाइकल जुृध्दा भएको दुर्घटनामा एक र डोटी जिल्लाको सिलगढीबाट गाँजरीतर्फ गइरहेको जीप गाँजरी सडकखण्डमा सडकमै पल्टिएर दुर्घटना हुँदा अर्काे एक जनाको मृत्यु भएको छ ।
लम्की बजारबाट धनगढीतर्फ आउँदै गरेको से३प३६८२ नंको मोटरसाइकल र विपरीत दिशातर्फ गइरहेको से४प१६९२नंको मोटरसाइकल ठोक्किँदा मोटरसाइकल पछाडि सवार कैलाली सुगरखाल गाविस तल्लापानी गाउँका २६ वर्षीय अम्बर चौधरीको मृत्यु भएको क्षेत्रीय ट्राफिक प्रहरी कार्यालय अत्तरियाले जनाएको छ । चौधरी से४प१६९२ नंको मोटरसाइकलको पछाडि सवार हुनुहुन्थ्यो ।
यसैगरी दुर्घटनामा परी घाइते भएकी से१ज६११ नंको जिपमा सवार गाँजरी गाविसकी २२ वर्षीया स्मृति कुँवरको डोटी अस्पतालमा उपचारका क्रममा मृत्यु भएको हो । दुर्घटनामा घाइते जिपका चालक नरबहादुर कुँवरलाई थप उपचारका लागि कैलालीको पद्मा अस्पताल ल्याइएको छ भने घाइते अन्य चार जनाको डोटी अस्पतालमा उपचार भइरहेको छ ।
चौतारा । सिन्धुपाल्चोकको भोटसिपा गाविस–५ मा हिजो अपराह्न मोटरसाइकल दुर्घटनामा चौतारा नगरपालिका–९ सानोसिरुबारीका ५० वर्षीया कमला गौतमको घटनास्थलमै मृत्यु भएको छ ।
ससुरालीबाट बडादसैँको टीका थापेर दम्पती घर फर्कँदै गर्दा कमलाको घटनास्थलमा मृत्यु भएको र उनका पति मोटरसाइकल चालक ५५ वर्षीय रेशमप्रसाद गम्भीर घाइते भएको जिल्ला प्रहरी कार्यालयका प्रहरी निरीक्षक योगराज खतिवडाले जानकारी दिनुभयो ।
वा ७७ प ३३६८ नंको मोटरसाइकल सडकबाट चिप्लिएर करिब १०० मि तल खसेर दुर्घटना भएको जनाइएको छ । घाइतेको थापाथलीस्थित नर्भिक अस्पतालमा उपचार भइरहेको छ । रासस
वि.सं.२०७३ असोज २८ शुक्रवार ०२:५४ मा प्रकाशित
